ललितपुर — रेडियो कान्तिपुरको रोड शो रेडियो अन ह्विल्स सम्पन्न भएको छ । 

ललितपुरको मंगलबजारमा बिहीबार रोड शो को १५ औं कार्यक्रम सकिएसँगै सातौं सिजनको रेडियो अन ह्विल्स समापन भएको हो । पुस १९ गते बाँकेको नेपालगन्जबाट सुरु भएको रोड शो धनगढी, सुर्खेत, बुटवल, पोखरा, चितवन, मकवानपुर, बर्दिबास, गाईघाट, बिर्तामोड, इटहरी, धरान, विराटनगर, लहान हुँदै ललितपुरमा पुगेर समापन भएको हो ।  

मंगलबजारमा आयोजित कार्यक्रममा असिम डी.सीले विश्वकपको टिकटसहित मुम्बइको ४ रात र ५ दिनको आकर्षक प्याकेज जिते । रेडियो अन ह्विल्समा सहभागीहरूले यसपटक आगामी फेब्रुअरी–मार्चमा आयोजना हुने टी–२० विश्वकपको टिकटसहित ४ रात ५ दिनको विशेष प्याकेज र दुईतर्फी यातायात सुविधा जित्ने अवसर पाएका थिए । 

कार्यक्रम आयोजना भएका १५ वटै स्थानमा एक्सट्रिम वा म्याक्स टाइगर इनर्जी ड्रिंक्स खरिद गर्ने सहभागीको नाम र नम्बर लक्की ड्रमा समावेश गरिएको र त्यसमध्येबाट प्रत्येक स्थानबाट एक–एक जना भाग्यशाली विजेताले विश्वकप प्याकेज प्राप्त गरेको आयोजकले जनाएको छ । 

कार्यक्रममा गायक विश्व नेपाली, हास्य कलाकार राजा राजेन्द्र पोखरेल, डान्स च्याम्पियन नेपालकी विजेता वर्षा फुँयाल तथा सिजन–१ की विजेता रोसिका राउतले गीत, संगीत र नृत्य प्रस्तुत गरेका थिए । 

गायक शिव परियारले चितवन र पोखराको कार्यक्रममा साथ दिए। यसपटक ३ वटा नयाँ स्थानमा कार्यक्रम आयोजना गरिएको र ती सबै स्थानमा श्रोता र दर्शकको साथ उल्लेखनीय रहेको रेडियोका स्टेशन म्यानेजर पवन आचार्यले जानकारी दिए । उनले भने, 'यसपटक हामीले लहान, बर्दिबास र उदयपुरमा कार्यक्रम गरेका थियौं । ती सबै ठाउँमा हामीले दर्शकको साथ र माया पायौं । आगामी दिनमा पनि ती स्थानलाई निरन्तरता दिंदै नयाँ स्थानमा पनि रोड शो लगिने छ ।'