सिरहा — मिनीट्रकमै स्टेज अनि स्टेजमा कलाकारहरू प्रस्तुति दिइरहेका छन् । जसो-जसो कलाकारहरू गाउँदै नाच्दै स्टेज तताइरहेका छन्, त्यसैगरी दर्शक पनि सुरमा ताल मिलाउँदै छमछमी नाचेर धूलो उडाइरहेका छन् ।

कान्तिपुर मिडिया ग्रुपअन्तर्गतको रेडियो कान्तिपुरले लहानमा सोमबार आयोजना गरेको 'रेडियो अन ह्विल्स' कार्यक्रमको दृश्य हो यो । रेडियो अन ह्विल्समा गायक विश्व नेपाली, हास्य कलाकार राजा राजेन्द्र पोखरेल, डान्स च्याम्पियन नेपालकी विजेता वर्षा फुयाँल तथा यशोदा ढकालले गीत, संगीत र नृत्य प्रस्तुत गरेका थिए ।

लहानस्थित प्रादेशिक अस्पतालका प्रमुख रंजित झाले पनि गीत गाए । रेडियो कान्तिपुरले रेडियोको प्रवर्द्धन र श्रोतासँग सम्बन्ध विस्तारको उद्देश्यले प्रत्येक वर्ष यो कार्यक्रम गर्छ । सांस्कृतिक प्रस्तुतिसँगै रमाइला खेल खेलाउने र पुरस्कार वितरण गरिने यो कार्यक्रम यसपालि मुलुकका विभिन्न १५ भन्दा बढी सहरमा गरिँदैछ ।