उदयपुर — रेडियो कान्तिपुरले बर्सेनि आयोजना गर्ने रोड सो ‘रेडियो अन ह्विल्स’को सातौं संस्करण मंगलबार गाईघाटमा सम्पन्न भएको छ ।

कार्यक्रममा गायक विश्व नेपाली, हास्य कलाकार राजा राजेन्द्र पोखरेल र डान्स च्याम्पियन नेपालका विजेता वर्षा फुयाल र सिजन-१ की विजेता रोसिका राउतले प्रस्तुति दिएका थिए । श्रोतासँग सम्बन्ध विस्तारका साथै रमाइला खेल र पुरस्कार वितरण गर्दै मुलुकका विभिन्न १५ भन्दा बढी सहरमा रेडियो कान्तिपुरले ‘रेडियो अन ह्विल्स’ कार्यक्रम आयोजना गरेको छ । 

उदयपुरकी दीपालाई टी/२० विश्वकपको टिकट

रेडियो कान्तिपुरले आयोजना गरेको ‘रेडियो अन ह्विल्स’ कार्यक्रममा उदयपुरकी दीपा राईले आकर्षक उपहार जितेकी छिन् । उदयपुरको गाईघाटस्थित पिपलचौकमा आयोजना गरिएको रोड सो कार्यक्रममा उनले भारतको मुम्बईमा फेब्रुअरी ८ मा हुने नेपाल र इङ्ल्याण्डबीचको टी/२० विश्वकप हेर्न पाउने भाग्यशाली उपहार पाएकी हुन् । एक्सट्रिम इनर्जी ड्रिंक्स खरिद गरेकी राईले लक्की ड्रमार्फत सो पुरस्कार पाएकी हुन् ।