काठमाडौँ — चितवनको नारायणगढस्थित नारायणी नदी किनार शनिबार एक्स्ट्रिममय भयो । गीतसंगीत, नाचगान, रमाइला खेल र आकर्षक पुरस्कार ।

एक्स्ट्रिम इनर्जी ड्रिङसले प्रायोजन गरेको सातौं संस्करणको रेडियो अन ह्विल्सको छैटौं कार्यक्रममा सबैभन्दा आकर्षणको केन्द्रबिन्दु एक्स्ट्रिमले वितरण गरेको टी–२० विश्वकप क्रिकेटको टिकटसहितको आकर्षक प्याकेज रह्यो ।

पुसको चिसोको पर्वाह नगरी दर्शक नारायणी नदी किनारमा राति ८ बजेसम्म झुमे । गायक शिव परियारले आफ्ना एक दर्जन बढी हिट गीत गाएसँगै कार्यक्रम समापन भयो । उनले नारायणगढले आफूलाई सधैं माया गर्ने गरेको भन्दै आभार प्रकट गरे ।

त्यसअघि राजा राजेन्द्र पोखरेलले हाँस्यव्यंग्य र प्यारोडी मिसिएको प्रस्तुति दिएका थिए । उनले राजनीति, नेपाली गीतसंगीत र समाजको चरित्रमाथि कटाक्ष गरे । अर्का गायक विश्व नेपालीले पनि मै पनि बन्छु कवि देवकोटा, मिठो साह्रै मिठो, परान परान जस्ता चर्चित गीत प्रस्तुत गरे ।

डान्स च्याम्पियन नेपालकी विजेता वर्षा फुयाल तथा सिजन–१ की विजेता रोसिका राउतले पनि दर्शकलाई नृत्यमार्फत भरपुर मनोरन्जन प्रदान गरे । त्यसमाथि एक्स्ट्रिम इनर्जी ड्रिङसका तर्फबाट रोड शोमा सहभागी डान्सरले पनि छुट्टै प्रस्तुति दिए ।

नारायणगढको कार्यक्रममा एक्स्ट्रिम इनर्जी ड्रिङस फ्यान बन्दै विश्वकपको टिकट स्थानीय उर्मिला श्रेष्ठले जितिन् । उनको नाम गोलाप्रथाबाट कार्यक्रमको अन्त्यमा निकालिएको थियो । उनी रोड शोमा पुरस्कार जित्ने दोस्रो महिला हुन् । यसअघि पनि सुर्खेतमा आयोजित कार्यक्रममा सुष्मा अर्यालले विश्वकपको टिकट जितेकी थिइन् ।

रेडियो अन ह्विल्समा सहभागीहरूले यस पटक आगामी फेब्रुअरी–मार्चमा आयोजना हुने टी–२० विश्वकपको टिकटसहित ४ रात ५ दिनको विशेष प्याकेज र दुईतर्फी यातायात सुविधा जित्ने अवसर पाउने रेडियो कान्तिपुरले जनाएको छ । कार्यक्रम आयोजना हुने १५ वटै स्थानमा एक्स्ट्रिम वा म्याक्स टाइगर इनर्जी ड्रिङस खरिद गर्ने सहभागीको नाम र नम्बर लक्की ड्रमा समावेश गरिने आयोजकले बताएको छ । प्रत्येक स्थानबाट एक–एक जना भाग्यशाली विजेताले विश्वकप प्याकेज जित्नेछन् ।