मकवानपुर — एक्सट्रिम इनर्जी ड्रिंक्स मुख्य प्रायोजक रहेको रेडियो अन ह्विल्स आईतबार मनहरी बजारमा पुग्दा मौसम चिसिएको थियो । तर, गायक विश्व नेपाली र हास्य कलाकार राजा राजेन्द्र पोखरेलको प्रस्तुतिसँगै मनहरी बिस्तारै तात्दै गयो ।

विश्वले कार्यक्रममा उपस्थित भएका सहभागीलाई पनि सँगै नचाए । विश्वले मकवानपुरमा थुप्रै कार्यक्रम गरे पनि मनहरी बजारमा भने पहिलो कार्यक्रम भएको बताए । उनले 'मै  पनि बन्छु कवि देवकोटा', 'मिठो साह्रै मिठो' र 'परान परान' गाउँदा माहौल  झनै तातिएको थियो । चितवनको कार्यक्रम सकेर रोड शो मकवानपुर आइपुगेको हो ।  

कार्यक्रममा पोखरेलले मुलुकको पछिल्लो अवस्थाका बारेमा व्यंग्य पनि गरे । एकता  दिवसको सन्दर्भ पारेर उनले पहिले नेपाल एकताबद्ध भए पनि अहिले विभिन्न मुद्दामा ए कता ? भन्ने अवस्था सिर्जना भएको भन्दै कटाक्ष गरे । स्ट्याण्डअप कमेडीसँगै उनले प्यारोडी गीत पनि प्रस्तुत गरे ।

कार्यक्रम अवधिभर एक्सट्रिमको स्टलमा सबैभन्दा  बढी भीड लागेको थियो । कारण, एक्सट्रिम  र म्याक्स टाइगर इनर्जी ड्रिंक्स पिएर लक्की ड्रमा आफ्नो नाम समावेश गर्नेको संख्या उल्लेख्य थियो । 'रेडियो अन ह्विल्स' आयोजना हुने १५ वटै सहरमा एक्सट्रिम इनर्जी  ड्रिंक्सले आसन्न टी–२० विश्वकपको टिकटसहित ४  रात र ५ दिनको मुम्बईको आकर्षक प्याकेज पनि उपलब्ध गराउँदै आएको छ ।