काठमाडौँ — रेडियो कान्तिपुरले बर्सेनि आयोजना गर्दै आएको रोड सो ‘रेडियो अन ह्विल्स’ को सातौं संस्करण यही शनिबारबाट सुरु हुँदै छ ।

बाँकेको नेपालगञ्जबाट सुरु हुने यो संस्करणको ‘रेडियो अन ह्विल्स’ मुलुकका विभिन्न १५ सहरमा आयोजना हुने रेडियो कान्तिपुरले जनाएको छ ।

श्रोतासँग सम्बन्ध विस्तारका साथै रमाइला खेल र पुरस्कार वितरणका साथै सडकमै नाचगान गरेर रोड सो हुँदै आएको छ ।

कार्यक्रममा ख्यातिप्राप्त राष्ट्रिय कलाकारका साथै स्थानीय कलाकारले पनि एउटै मञ्चमा प्रस्तुति दिनेछन् ।

यसपटकको रोड सोमा गायक शिव परियार र विश्व नेपालीका साथै हास्यकलाकार राजा राजेन्द्र पोखरेल र डान्स च्याम्पियन नेपालका विजेता वर्षा फुयाँल र सिजन १ की विजेता रोसिका राउतले आफ्नो गीत–संगीतका साथै नृत्य प्रस्तुत गर्ने कार्यक्रम रहेको रेडियो कान्तिपुरको भनाइ छ ।

रोड सो आगामी ८ माघमा काठमाडौंमा कार्यक्रम गरेर सकिनेछ । यसपटक रोड सो गरिने स्थानमा नेपालगञ्ज, धनगढी, सुर्खेत, बुटवल, पोखरा, नारायणगढ, हेटौंडा, वीरगञ्ज, जनकपुर, लहान, इटहरी, विराटनगर, विर्तामोड र धरान छन् ।