काठमाडौँ — अभिनेता गोविन्दाले ८० को दशकको मध्यतिर बलिउडमा पाइला टेके । ९० को दशकमा त ठूलो पर्दामा उनले एकछत्र राज गरे ।

नृत्य, कमेडी र अभिनय तिनवटै कुरामा उनी प्रसिद्ध थिए । करिअरभरि एकपछि अर्को सफल फिल्म दिएका गोविन्दाको एउटा फिल्म भने यस्तो पनि रह्यो, जसले बक्स अफिसमा बजेटको एक प्रतिशतसमेत कमाउन सकेन ।

आज गोविन्दा आफ्नो ६२औँ जन्मदिन मनाउँदै छन् । यो घडीमा गोविन्दा आफ्नो सबैभन्दा सुपरहिट र फ्लप फिल्मबारे सम्झिन्छन् । 

६ वर्षअघि हलमा रिलिज भएको फिल्म ‘रंगीला राजा’ कहिले आयो, गयो यसबारे दर्शकले नै चाल पाएनन् । बक्स अफिसमा असफल भएपछि गोविन्दाले त्यसपछि कुनै पनि नयाँ फिल्ममा काम गरेनन् । 

गोविन्दाको जन्म अभिनेता अरुण कुमार आहूजा र गायिका निर्मला देवीको परिवारमा सन् १९६३ डिसेम्बर १ मा मुम्बईमा भएको थियो ।

सन् १९८६ मा अभिनय यात्रा सुरु गरेका गोविन्दाको करिअरको सबैभन्दा ठूलो फ्लप फिल्म नै ‘रंगीला राजा’ हुन पुग्यो । यो फिल्म सन् २०१९ मा रिलिज भएको थियो ।

‘रंगीला राजा’ का निर्माता पहलाज निहलानी हुन् भने निर्देशन पहलाज निहलानी र सिकन्दर भारतीले संयुक्त रूपमा गरेका थिए ।

फिल्ममा गोविन्दासँगै मिशिका चौरसिया, अनुपमा अग्निहोत्री, शक्ति कपूर, दिगांगना सूर्यवंशी र महेश आनन्दजस्ता कलाकारको अभिनय रहेको थियो ।