काठमाडौँ — अजय देवगन हाल २०२६ मा रिलिज हुने फिल्महरुमा व्यस्त छन् । यो वर्ष मात्रै उनको चार फिल्म रिलिज भएका थिए ।

त्यसमध्ये दुई असफल भए भने दुईले राम्रो व्यापार गरे । अहिलेका निकै व्यस्त कलाकारका सुरुवाती दिनहरु कस्ता थिए त ?

अजयले २६ वर्ष अगाडिका एक किस्सा अहिले पनि बिर्सन सक्दैनन्, जहाँ उनी निश्चित भइसकेको फिल्म अक्षय कुमारले अन्तिम क्षणमै लिएर गए । अजय र अक्षय एक–अर्कालाई ‘दोस्त’ भन्ने कलाकार हुन् । तर सन् १९९९ मा रिलिज भएको फिल्म ‘जानवर’ का लागि भएको प्रतिस्पर्धाको प्रसँग भने आजसम्म चर्चामा छ । 

यो फिल्मका लागि न अजय पहिलो रोजाइ थिए, न अक्षय । सुनिल दर्शनले पहिलो प्रस्ताव सनी देओललाई गरेका थिए । सनीले फिल्म गर्न सहमति जनाए पनि, ‘लन्डन’ फिल्मलाई लिएर निर्माणपक्षसँग परेको विवादका कारण उनी बाहिरिए । 

सनीपछि सुनील दर्शनले अजय देवगनलाई ‘जानवर’ का लागि फाइनल गरिसकेका थिए । दुवैबीच भेटेर कानुनी कागजात साइन गर्ने तयारीसम्म पुगेको थियो । तर यही बीचमा निर्देशक सुनील दर्शनलाई अक्षय कुमारको फोन आयो ।

त्यतिबेला अक्षय कुमारको करिअर उस्तो चम्किलो थिएन । लगातार केही फिल्म असफल भएका थिए उनका । तर उनले ‘जानवर’ गर्न तीव्र इच्छा राखे । निर्देशक उनीबाट प्रभावित भए र अन्ततः अक्षयलाई फिल्ममा साइन गराए ।