बलिउडमा ‘जेलर’को सिक्वेल निर्माणको तयारीसँगै शाहरुख खानको सम्भावित उपस्थितिले फिल्मप्रेमीहरूमा उत्साह थपिएको छ, यद्यपि आधिकारिक पुष्टि भएको छैन।
काठमाडौँ — दक्षिण भारतीय सुपरस्टार रजनीकान्तको फिल्म ‘जेलर’ लोकप्रिय भयो । भारतीय सञ्चारमाध्यममा उल्लेख भएअनुसार रजनीकान्तले कमल हासनसँग नयाँ फिल्म साइन गरेका छन् ।
सँगै ‘जेलर’को सिक्वेल ‘जेलर २’ पनि आउने चर्चा बलिउड फिल्म वृत्तमा छ । रोचक कुरा त यो फिल्ममा शाहरुख खानको पनि प्रवेश हुने चर्चा उत्तिकै छ ।
यस वर्ष रजनीकान्तको ‘कुली’मा आमिर खानले क्लाइमेक्समा केमियो गरेका थिए । अब ‘जेलर २’मा शाहरुखको प्रवेशलाई लिएर दुवैका प्रशंसकहरू उत्साहित छन् ।
यद्यपि हालसम्म आधिकारिक पुष्टि भइसकेको छैन । ‘जेलर’ सन् २०२३मा रिलिज भएको थियो । निर्देशक नेलसन दिलीपकुमारले सिक्वेलका लागि बलिउडका स्टारहरूसँग पनि सहकार्य गर्ने योजना बनाइरहेका छन् ।
‘कुली’मा पनि सुरुमा शाहरुखलाई केमियोका लागि अफर गरिएको चर्चा चलेको थियो । तर उनले अस्वीकार गरेको बताइएको थियो ।
शाहरुख भने अहिले आगामी फिल्म ‘किङ’मा काम गरिरहेका छन् । यो फिल्म अर्को वर्ष रिलिज हुनेछ ।
हालै उनको जन्मदिनका अवसरमा फिल्मको पहिलो लुक सार्वजनिक भएको थियो । फिल्ममा दीपिका पादुकोण, अभिषेक बच्चन, सुहाना खान, रानी मुखर्जी लगायत धेरै कलाकार देखिनेछन् ।
