पछिल्ला दिनमा स्वास्थ्य समस्या देखिएपछि अस्पताल भर्ना भएका धर्मेन्द्रलाई अब परिवारले घरमै उपचार गर्ने निर्णय गरेको आधिकारिक वक्तव्यमा उल्लेख छ।
काठमाडौँ — बलिउड अभिनेता धर्मेन्द्रको स्वास्थ्यमा सुधार आएको छ । आज बिहान करिब ७:३० बजे उनलाई ब्रीच क्यान्डी अस्पतालबाट डिस्चार्ज गरेर परिवारले घर लगेको छ ।
परिवारले अब उनलाई घरमै उपचार गराउने निर्णय गरेको छ । उनलाई जुहूस्थित बीच हाउसमा लगिएको थियो । डिस्चार्ज हुनुअघि उनका छोरा बबी देओल अस्पताल पुगेका थिए । अहिले धर्मेन्द्र घरमै छन् ।
धर्मेन्द्रलाई पछिल्ला केही दिनदेखि स्वास्थ्य समस्या भएका कारण अस्पताल भर्ना गरिएको थियो । सोमबार उनको अवस्था केही बिग्रिएपछि परिवारका सबै सदस्य अस्पताल पुगेका थिए ।
धर्मेन्द्रको परिवारले आधिकारिक वक्तव्य जारी गर्दै बाँकी उपचार घरमै हुने जनाएको पनि छ । ‘अब कसैले पनि अनावश्यक अड्कलबाजी नगरोस्। धर्मेन्द्रजी र हाम्रो परिवारको गोपनीयताको सम्मान गर्नुहोला । उहाँ सबैको माया, शुभकामना र प्रार्थनाका लागि आभारी हुनुहुन्छ,’ परिवराले जारी गरेको वक्तव्यमा भनिएको छ ।
यो वक्तव्य बबी देओल घर फर्किएलगत्तै जारी गरिएको थियो ।
मंगलबार भने धर्मेन्द्रको स्वास्थ्य अवस्थाबारे भ्रामक समाचार सामाजिक सञ्जाल र केही सञ्चारमाध्यमहरूले फैलाएका थिए । परिवारले भने भ्रामक समाचारप्रति आपत्ति समेत जनाएको थियो ।
