काठमाडौँ — 'रमिताको पिरती'बाट गायक समीर श्रेष्ठले फिल्ममा डेब्यु गर्दैछन् । निर्माण पक्षले काठमाडौंमा आयोजित पत्रकार सम्मेलनमा फिल्मको फस्टलुक सार्वजनिक गर्दै आगामी माघ २३ मा फिल्म प्रदर्शनमा ल्याउने घोषणासमेत गरेको छ ।

यो फिल्मलाई सुदिप्ताले निर्देशन गरेकी हुन् । निर्माण पक्षले सार्वजनिक गरेको फस्टलुकमा अभिनेत्री आना शर्मा, धिरज मगर र समीर श्रेष्ठ देखिन्छन् । पत्रकार सम्मेलनमै यो फिल्मबाट युवा गायक समीर श्रेष्ठले फिल्ममा डेब्यु गर्ने जानकारी दिइएको हो ।

महिला प्रधान यस फिल्ममा आनाको प्रमुख भूमिका छ । फिल्मको पोस्टरलेसमेत यही दर्शाउँछ । समीर ‘थामन हात’, ‘जे छौ तिमी’, ‘हेर न’, ‘मेरो मनमा’लगायतका गीतका गायक हुन् । सुरुवातमा फिल्ममा संगीतकारका रुपमा जोडिए पनि कथावस्तु मन परेपछि अभिनयमा सरिक भएको समीरले बताए ।