काठमाडौँ — असोज ३१ बाट प्रदर्शनमा आएको फिल्म 'जेरी अन टप'ले प्रदर्शनको दशौं दिन १२ करोडको व्यापार गरेको छ । अनमोल केसी अभिनीत यो फिल्मले नेपाल र विदेश प्रदर्शनबाट यो व्यापार गरेको निर्माण पक्षले जनाएको छ । 

निर्माण पक्षका अनुसार फिल्मले प्रदर्शनको नवौं दिन एकैपटक १ करोडमाथिको व्यापार गरेको थियो । निर्माता सरोज न्यौपानेका अनुसार फिल्मले शनिबार मात्रै १ करोड १ लाख ३२ हजार ८ सय १३ रुपैयाँको व्यापार गरेको हो । फिल्मले प्रदर्शनको दोस्रो सातामा पनि हाउसफूल दर्शक प्राप्त गर्दा निर्माण टोली दंग देखिन्छ । 

'१० दिनमा १२ करोड । खास उपलब्धि त हजुरहरूबाट प्राप्त प्रेम नै हो । जेरी अन टपलाई विशेष बनाइदिनु भएकोमा धन्यवाद,' अनमोलले खुसी हुँदै सामाजिक सञ्जाल फेसबुकमा लेखेका छन्, 'यो खासमा तपाईंहरूकै अटुट साथ र आशीर्वादकै उपहार हो ।'