आशा भोस्लेको स्वर रहेको पुरानो गीतमा सञ्जीवनीको नयाँ स्वर मिसाइएको छ, जसको निर्माण रोहित अधिकारीले गरेका हुन्।
काठमाडौँ — रोहित अधिकारी फिल्म्सको ब्यानरमा निर्माण भएको फिल्म 'माइतीघर'को शीर्ष गीत सार्वजनिक भएको छ । ओएसआर डिजिटलबाट सार्वजनिक गरिएको गीतमा सञ्जीवनीको स्वर छ । 'वसन्त नै बस्न खोज्छ यहाँ लोलाएर' बोलको यो गीतमा किरण खरेलको शब्द, स्वर्गीय जयदेवको संगीत छ ।
गीतको ओरिजिनल भर्सनमा भने गायिका आशा भोस्लेको स्वर समावेश छ ।
निर्माता रोहित अधिकारीले 'माइतीघर' नामक पुरानो गीतमा सञ्जिवनीको स्वर मिसाउँदै सार्वजनिक गरेको हो । गीतको भिडियोमा नायिकाद्वय उपासना सिंह ठकुरी र श्यामाश्री शेर्पा देखिन्छन् । दशैंको फूलपातीबाट प्रदर्शनमा यो फिल्ममा मानकृष्ण महर्जन र सुशन प्रजापतिको छायांकन छ । सुरेन्द्र पौडेलको सम्पादन रहेको फिल्मलाई
मिलन तामाङले निर्देशन गरेका हुन् । फिल्ममा केदार प्रसाद घिमिरे, धिरज मगर, प्रकाश सपुत, उपासना सिंह ठकुरी, श्यामाश्री शेर्पा, युवराज लामा, बुद्धि तामाङ, शिशिर वाङ्देल, रजनी गुरुङ, सन्तोष शाही, फूलकुमार बम्जन, संगीता थापा लगायतको अभिनय छ । फिल्ममा चन्द्रकुमार दोङको कथा छ ।
