भारतमा बज्ने नेपाली संगीतबापत भारतले नेपाललाई रोयल्टी बुझाउनुपर्ने
काठमाडौँ — नेपाल र भारतका संगीतकर्मीहरूबीच रोयल्टी संकलन तथा वितरणसम्बन्धी द्वीपक्षीय सम्झौता भएको छ । जापानको राजधानी टोकियोमा आयोजित एक कार्यक्रममा नेपाली संगीतकर्मीहरूको संस्था ‘पर्फर्मर्स सोसाइटी अफ नेपाल’ र भारतको ‘इन्डियन सिङ्गर्स एन्ड म्युजिसियन राइट्स एशोसिएसन’ बीच यो सम्झौता भएको हो ।
सम्झौतापत्रमा पर्फर्मर्स सोसाइटी अफ नेपालका उपाध्यक्ष निर्णय एनएसके र इन्डियन सिङ्गर्स एन्ड म्युजिसियन राइट्स एशोसिएसनका संस्थापक सञ्जय टन्डनले हस्ताक्षर गरेका छन् । यससँगै अब नेपालमा भारतीय कलाकारका गीत-संगीत सार्वजनिक रूपमा (जस्तै- होटल, रेस्टुरेन्ट, टेलिभिजन, रेडियो, यातायात, पिकनिक स्थल लगायत) मा प्रयोग गर्दा भारतीय कलाकारलाई सो बापतको रोयल्टी नेपालले तिर्नुपर्नेछ । त्यस्तै, भारतमा नेपाली कलाकारहरूको संगीत बज्दा भारतले पनि नेपालीलाई रोयल्टी बुझाउनुपर्नेछ ।
सो अवसरमा विश्वभरका कलाकारहरूको अधिकार व्यवस्थापन गर्ने संस्था ‘एससीएपीआर’का प्रबन्ध निर्देशक रेमी डेस्रोसिएर्ससँगै एसियाका विभिन्न देशका कलेक्टिभ म्यानेजमेन्ट अर्गनाइजेसन (सीएमओ) का प्रतिनिधि उपस्थित थिए । पर्फर्मर्स सोसाइटी अफ नेपालले यसअघि जापान, मलेसिया, थाईल्यान्ड र फिलिपिन्सका सीएमओहरूसँग पनि यस्तै प्रकृतिको द्विपक्षीय सम्झौता गरिसकेको जनाएको छ ।
के हो सीएमओ ?
कलेक्टिभ म्यानेजमेन्ट अर्गनाइजेसनले संगीतकर्मी, गीतकार, संगीत निर्माता, लेखकलगायत सर्जकहरूको अधिकार व्यवस्थापनको काम गर्छन् । कुनै पनि गीत-संगीत प्रयोगका लागि अनुमति (लाइसेन्स) दिने, रोयल्टी संकलन गर्ने र सम्बन्धित अधिकारवालालाई वितरण गर्ने जिम्मेवारी पनि सीएमओहरूको हो ।
