चितवन — निर्देशन दिपक रौनियारको फिल्म ‘राजागंज’ चैत्र १ गतेदेखि प्रदर्शनमा आउँदैछ । त्यसअघि नै सोमबार साँझ फिल्मको नारायणगढ इन्द्रदेव सिनेमा हलमा प्रिमियर शो सम्पन्न भएको छ ।

पूर्वको विर्तामोड, इटहरी, जनकपुर, विरगञ्ज हुँदै प्रिमियर शोका लागि निर्देशक रौनियारसहित कलाकारको टोली नारायणगढ आइपुगेका हुन् । 

सिनेमाको कथामा मधेश छ । पहाडी समुदायकी महिलासँग बिहे गरेका एक जना मधेशी नेता जो प्राय: काठमाडौंमा नै बस्छन् र सांसद पनि हुन् । मधेसमा उनको छोरासँगै अर्को एकजना बालक अपहरणमा परेपछि त्यसको अनुसन्धान गर्न खटिएकी प्रहरी निरीक्षक पूजासँगै सिनेमाको कथा अगाडी बढ्छ । प्रहरी निरीक्षक पुजाको भुमिकामा रहेकी आशा मगराती सिनेमाको केन्द्रीय पात्र हुन् । 

प्रहरी उपरीक्षक (एसपी) दयाहाङ राई, प्रहरी निरीक्षक बनेकी नीकिता चाण्डक र प्रहरीकै भूमिकामा रहेका विजय बरालले अपहरित बालकलाई खोज्ने क्रममा के कस्तो भूमिका खेल्छन् ? उनीहरुको कार्यशैली, मनोभावना र सम्बन्धसँगै मधेसका विभिन्न पाटाहरु खुल्दै जान्छ । मधेश आन्दोलन चल्दै गर्दा भएको नेतापुत्रको अपहरणले मधेसको राजनैतिक, शैक्षिक र सामाजिक पाटोहरुलाई पस्कन्छ । कसले न्याय पायो, कसलाई अन्याय भयो ? किन यस्तो भयो ? सिनेमा सकिँदै गर्दा दर्शकको मस्तिष्कमा यी प्रश्न घुम्न थाल्छन् ।