धनकुटा-५ तल्लोकोप्चेस्थित गणेश चोकमा सोमबार अपराह्न सर्वसाधारणको खचाखच थियो । उनीहरु सडक नाटक हेर्ने दर्शक थिए । जिल्लामा एकैपटक १३ मुलुकका ख्यातिप्राप्त कलाकारले आफ्नो प्रस्तुति दिए । सडक नाटक हेर्न जिल्लामै यति ठूलो भीड पहिलोपटक भएको स्थानीयबासी बताउँछन् । सर्वनाम नाट्य समूहको संयोजनमा नाट्यकर्मीले संयुक्त रुपमा सडक नाटक प्रस्तुत गरेका हुन् ।

इन्टरनेसनल पिपुल्स थिएटर फेस्टीभल सोसाइटी र सर्वनाम थिएटरको सहकार्यमा उक्त नाटक प्रस्तुत गरिएको थियो । जसको अगुवाइ सर्वनाम नाट्य समूहका संस्थापक अशेष मल्लले गरेका थिए । शान्तिका लागि थिएटर, संस्कृतिको आदानप्रदान र दिगो भविष्य संरक्षण’ मूल नारा रहेको फेस्टिभलमा नेपालसहित जापान, भारत, बंगलादेश, चीन, थाइल्यान्ड, हङकङ, कोरिया, फ्रान्स, बेलायत, ताइवान, फिलिपिन्स र सिङ्गापुरका ४० ख्यातिप्राप्त कलाकारको प्रस्तुति रहेको थियो ।

नाटक हेर्न पुगेकी सविता श्रेष्ठले कतिपय भाषा नबुझिए पनि कलाकारको कारुणिक प्रस्तुतिले भावुकसमेत बन्न पुगेको बताइन् । ‘जीवनमै यति बृहत् सडक नाटक पहिलोपटक हेर्दा उत्साही भएँ,’ उनले भनिन् । धनकुटा-५ का जेपी भुजेलले युवावस्थामा आफूले रङ्गमञ्चमा अभिनय गरेको क्षण याद दिलाएको बताए ।

उक्त अवसरमा भारतका नाट्य चेतनाद्वारा प्रस्तुत ‘देवी’, फिलिपिनी नाटक ‘अरोमोमाँगो’ बंगलादेशको विशेष नृत्य र अभिनय, नेपालका लिम्बु, नेवारी लगायतका नृत्यसमेत प्रस्तुत गरिएको थियो । फेस्टिभलअन्तर्गत एसियाका १३ देशका विभिन्न सहरमा २ सय बढी रंगकर्मी तथा कलाकार सहभागी भइसकेको बताइएको छ ।

यसअघि काठमाडौंमा फागुन १७ देखि पाँच दिन र त्यसपछि २३ देखि २५ गतेसम्म इटहरीमा उक्त नाटक प्रस्तुत गरिएको थियो । धनकुटामा भने एक दिन मात्र प्रस्तुत गरिएको कोप्चे पुनर्जागरण अभियानका सल्लाहाकार राजेन्द्र प्रधानले बताए । नाटकमा सहभागी हुन जिल्ला पुगेका रंगकर्मीलाई धनकुटाको सिरान बजार, माथिल्लो र तल्को कोप्चे अर्थात् ओरेन्ज सिटीमा भव्य स्वागत गरिएको थियो ।