अहिले सलमान खानको नयाँ फिल्म ‘सिकन्दर’को चर्चा
काठमाडौँ — अहिले सलमान खानको नयाँ फिल्म ‘सिकन्दर’बारे चर्चा भइरहेको छ । एआर मुरगादोसको निर्देशनमा बनिरहेको यो फिल्मको टिजर हालै रिलिज भयो । यो फिल्म इदमा रिलिज हुनेछ ।
‘सिकन्दर’ सलमानको करिअरका लागि महत्त्वपूर्ण फिल्म मानिएको छ । किनकि उनका पछिल्ला केही फिल्मले अपेक्षाअनुसार व्यापार गर्न सकेका छैनन् ।
‘सिकन्दर’ नामको फिल्म २५ वर्षअघि पनि निर्माण गर्ने भनिएको थियो ।
भारतीय सञ्चारमाध्यमका अनुसार अभिनेता सनी देओलले फिल्मका लागि साइन गरेका थिए । तर त्यो फिल्म कहिल्यै बनेन ।
त्यो फिल्म पिक्चर परफेक्ट प्रोडक्सनद्वारा बनाइँदै थियो । फिल्ममा चन्द्रचूड सिंहलाई पहिलो कास्टमा राखिएको थियो । पछि उनको ठाउँमा सनी देओल भित्रिए ।
सनी देओलको ‘सिकन्दर’ लाई सुनिल बोहराले निर्देशन गर्दै थिए । फिल्मको कथा पनि उनैले लेखिरहेका थिए । ‘सिकन्दर’ मा सनीसहित तब्बू, दीप्ति भटनागर, राहुल देव, मुकेश ऋषि र निर्मल पांडे जस्ता कलाकारको लाइनअप बनेको थियो ।
तर, यो फिल्म कहिल्यै फ्लोरमा पुगेन । प्राविधिक कारणवश फिल्म बनेन ।
तर २५ वर्षपछि यही नामको फिल्म अब रिलिजको छेकोमा छ । यसले कस्तो व्यापार गर्नेछ, त्यो भने हेर्न बाँकी छ ।
