काठमाडौँ — गीतकार दिलकुमार तामाङको नयाँ गीत ‘धेरै गर्व गर्यौँ हामीले’को लिरिकल भिडियो सार्वजनिक गरिएको छ ।
निजामती सेवामा कार्यरत तामाङले आफ्नै युट्युब च्यानल दिल्स् क्रियसनबाट शनिबार उक्तव स्वदेश गीत सार्वजनिक गरेका हुन् । गायक राजेशपायल राई र नेपाल आइडलबाट उदाएकी गायिका ममता गुरुङको स्वर रहेको उक्त गीतमा ख्यातीप्राप्त संगीतकार दीपक शर्माले संगीत भरेका छन् ।
गीतमार्फत तामाङले नेपालीहरू इतिहास र वीरताको गर्व र आत्मरतिमा असाध्यै रमाउने गरेका तर वीरतापूर्ण इतिहासको जगमा देशको पहिचानलाई विश्व मञ्चमा अझैमाथि उठाउन मिहिनेत र इमानको कमी रहेको सन्देश दिन खोजेको बताए ।
पाँचथरमा जन्मिएका गीतकार तामाङले यसअघि ‘पूर्वै पाँचथर’ बोलको गीत सार्वजनिक गरेका थिए । उनी हाल गृह मन्त्रालयका सूचना अधिकारीको रूपमा कार्यरत छन् ।
