काठमाडौँ — प्रख्यात निर्देशक क्रिस्टोफर नोलान र उनकी पत्नी एवं निर्माता एमा थमसलाई फिल्म क्षेत्रमा उनीहरूको योगदानका लागि ‘ब्रिटिस नाइटहुड’ र ‘डेमहुड’ उपाधि दिइएको छ । बेलायत सरकारको यो प्रतिष्ठित सम्मानपछि नोलानको नामको अगाडि अब ‘सर’ उपाधि जोडिने भएको छ भने थमसको नामको अगाडी 'डेम' लेखिनेछ ।

बुधबार बकिंङ्महम प्यालेसमा आयोजित समारोहमा राजा चार्ल्स तृतीयले नोलान दम्पतीलाई बेलायती परम्पराअनुसार 'डबिङ' लगायत रीतिरिवाजपश्चात मेडल हस्तान्तरण गरेका थिए । नोलानले ‘परमाणु बमका पिता’ भनिने जे रोबर्ट ओपेनहाइमरको जीवनमा आधारित ‘ओपेनहाइमर’ फिल्म बनाएर गत वर्ष अस्कार अवार्ड जितेका थिए । ओपेनहाइमरले सर्वोत्कृष्ट फिल्म र सर्वोत्कृष्ट निर्देशकसहित सातवटा विधामा अस्कार अवार्ड प्राप्त गरेको थियो ।

ब्रिटिस नाइटहुड सम्मान पाएकोमा निर्देशक नोलानले आभार प्रकट गरेका छन् । राजा चार्ल्ससँग भेट्न पाउँदा असाध्यै रमाइलो लागेको पनि उनले बताएका छन् । यो सम्मान बेलायती सम्राटले विभिन्न क्षेत्रमा कृयाशील व्यक्तिहरूलाई व्यक्तिगत रूपमै प्रदान गर्दै आएका छन् । पछिल्लो समय क्यान्सर रोगको उपचार गराइरहेका राजा चार्ल्स शाही कार्यक्रमहरूमा उपस्थित हुँदैन थिए । नोलान दम्पतीलाई सम्मानित गर्ने समारोहमा भने उनी शाही पोसाकमा आएका थिए । उनले नोलान दम्पतीको कामको प्रशंसा गरेका थिए ।