काठमाडौँ — हामीमध्ये धेरै दसैंमा घर जान सार्वजनिक सवारीसाधनको टिकट बुकिङ खुल्ने प्रतीक्षामा छौं । उता भारतमा चाहिँ अबको तीन महिनापछि हुने बेलायती रक ब्यान्ड ‘कोल्डप्ले’ को अग्रिम टिकट काट्न तँछाडमछाड चलिरहेको छ ।

विश्वव्यापी सांगीतिक यात्राका क्रममा कोल्डप्ले आगामी जनवरी १८, १९ र २१ मा प्रस्तुतिका लागि भारत आउँदै छ । मुम्बईमा हुने त्यही कन्सर्टको यो साता टिकट खुला भएपछि त्यसले भारतमा खैलाबैला मच्चाएको हो । 

भारतको समाजवादी पार्टीका अध्यक्ष एवं लोकसभा सांसद अखिलेश यादवले कोल्डप्लेको कन्सर्टको टिकट खरिद–बिक्री प्रसंगमा मनोरञ्जनको हक सबैलाई बराबर हुनुपर्ने विषय उठाएका छन् । सर्वसुलभ हुनु कुनै पनि कलाको मानवीय–सामाजिक पक्ष भएको उनको धारणा छ । कोल्डप्लेको टिकट कालोबजारी गरेर महँगोमा बिक्री भएपछि अखिलेशले यसमा प्रशासनिक कमजोरीसमेत झल्किने बताएका छन् । 

सकेसम्म धेरै प्रशंसकमाझ पुग्ने र क्रयशक्ति कमजोर भएकाहरूले पनि कन्सर्ट हेर्न सकून् भनेर कोल्डप्लेले अक्सर आफ्ना कार्यक्रमको टिकट मूल्य सबैलाई मिल्ने गरी समायोजन गर्दै आएको छ । डीवाई पाटिल स्टेडियममा हुने कन्सर्टमा पनि लेभल, लाउन्ज र स्टेजअघिको स्थानअनुरूप २५ सय भारतीय रुपैयाँदेखि ३५ हजार भारुसम्म टिकटको मूल्य राखिएको छ । तर, त्यहाँ हुन लागेको ‘म्युजिक अफ द स्पेयर वर्ल्ड टुर’ को टिकट कालोबजारीका माध्यमबाट अधिक मूल्यमा किनबेच भएपछि विवाद उत्पन्न भएको हो ।

कालोबजारीमा साढे ३ लाखदेखि १० लाख भारुसम्ममा टिकट खरिद–बिक्री भएको समाचार बाहिरिएका छन् । टिकट बेच्ने आधिकारिक प्लाटफर्म ‘बुक माई शो’ ले यसविरुद्ध प्रहरीमा जाहेरी दिएको छ । यसअघि गायक दिलजित दोसान्झको अक्टोबरमा हुने कन्सर्टको अग्रिम टिकट सुविधालाई लिएर पनि यस्तै विवाद भएको थियो । दिलजितका प्रशंसकहरूले टिकट बुकिङमा हुने बेथितिविरुद्ध उजुरी हालेका थिए । दिल्ली प्रहरीले सामाजिक सञ्जालमार्फत टिकट कालोबजारी गर्नेलाई चेतावनी दिएको थियो । 

अघिल्लो साता मात्रै एप्पलको नयाँ प्रोडक्ट, आइफोन १६ किन्न २४ घण्टा लाइनमा उभिएर आपसमा धक्का–मुक्कासमेत गरेका कतिपय भारतीय नागरिकहरू यो साता कोल्डप्लेको टिकट काट्न अनलाइन प्लाटफर्ममा ह्वारह्वारी ओइरिए । आइतबार कन्सर्टका लागि बुकिङ खुल्नासाथ ‘बुक माई शो’ प्लाटफर्ममा एकसाथ १ करोडभन्दा धेरैले टिकट किन्न खोजेपछि उक्त प्लाटफर्म क्र्यास भयो अर्थात् भार थेग्न नसकेर अवरुद्ध बन्यो । 

त्यति हुँदा पनि सबैले टिकट पाउने सम्भावना त कुरै भएन । तथापि, अधिक मागका कारण भारतमा थप एक दिन कन्सर्ट गर्ने कोल्डप्लेले निर्णय गरेको छ । जनवरी २१ का लागि थप गरिएको तेस्रो दिनको कन्सर्टको टिकट नोभेम्बर २२ मा खुला गरिनेछ र यसको मूल्य समान २ हजार भारु तोकिएको छ । कोल्डप्लेको कन्सर्ट हेर्न भारतका विभिन्न राज्यबाट प्रशंसकहरू एक ठाउँ जम्मा हुन लागेका छन् । यसले गर्दा कन्सर्ट हुने साता मुम्बईका होटलहरूको मूल्य ३ सय प्रतिशतले वृद्धि भइसकेको इकोनमिक टाइम्सले जनाएको छ । ‘स्टेडियम आसपासका होटलहरू बुक्ड भइसकेका छन् र तिनको मूल्य एक रातको १ लाख ४२ हजार रुपैयाँसम्म पुगेको छ,’ टाइम्सले लेखेको छ, ‘यति हुँदा पनि माग अझै थेगिनसक्नु छ ।’ 

यसअघि सन् २०१६ मा पनि भारतमा कन्सर्ट गरेको कोल्डप्ले लाइभ प्रस्तुतिका लागि असाध्यै प्रतिष्ठित छ । हेर्नै पर्ने प्रस्तुतिका रूपमा उनीहरूको कन्सर्टलाई लिइन्छ । रंगीन बत्तीहरू, पटका, अन्तरिक्षजस्तो आभास दिने ‘भिजिअल इफेक्ट्स’ समावेश गरेर दर्शकलाई ‘इम्मर्सिभ एक्सपेरियन्स’ (त्यही लोकमा मुग्ध हुने) अनुभूति सिर्जना गर्ने गरी प्रस्तुति डिजाइन गरिएको हुन्छ । ब्यान्डले इजिप्टको पिरामिड्स अफ गिजा, चीनको ग्रेटवालजस्ता पृथक् ठाउँहरूमा पनि भव्य कन्सर्ट गरेको छ । ब्यान्डका ‘यल्लो’, ‘फिक्स यु’, ‘समथिङ जस्ट लाइक दिस’, ‘द साइन्टिस्ट’, ‘भिभा ला भिडा’, ‘अ स्काई फुल अफ स्टार्स’, ‘हाइम फर द विकेन्ड’ जस्ता गीत चर्चित छन् ।

सन् १९९६ मा लन्डनमा स्थापना भएको यो ब्यान्डका एल्बमहरू १० करोडभन्दा धेरै बिक्री भइसकेका छन् भने स्पटिफाई र युट्युबजस्ता ‘स्ट्रिमिङ’ प्लाटफर्ममा पनि ब्यान्डका गीत एवं प्रस्तुतिहरू धेरै हेरिनेमा पर्छन् । ब्यान्डले संगीत क्षेत्रको प्रतिष्ठित ग्रामी अवार्ड ८ पटक हात पारिसकेको छ । 

विश्वमा ब्यान्ड संगीत सुस्ताएका बेला कोल्डप्ले भने अपवादका रूपमा चर्चित मात्रै छैन, यसलाई २१ औं शताब्दीको सबैभन्दा प्रभावशाली ब्यान्डका रूपमा समेत लिइन्छ । ब्यान्डमा क्रिस मार्टिन मुख्य भोकलिस्ट र पियानिस्टका रूपमा छन् भने जनी बकल्यान्ड लिड गिटारिस्ट, विल च्याम्पियन ड्रमर तथा पर्कसनिस्ट र फिल हार्भे क्रिएटिभ डिरेक्टरका रूपमा सामेल छन् । 

ब्यान्डले दुई वर्षअघि कोस्टारिकाबाट सुरु गरेको ‘म्युजिक अफ द स्पेयर्स वर्ल्ड टुर’ सन् २०२५ सम्मका लागि तय गरिएको छ । यस सांगीतिक यात्राका क्रममा उत्तर अमेरिका, दक्षिण अमेरिका, युरोप र एसियाका विभिन्न देशमा गरी हालसम्म १६४ वटा कन्सर्ट गरिसकेको छ भने ९६ लाख दर्शक सहभागी भइसकेको र अहिलेसम्म १.०५९ अर्ब डलर कुल आम्दानी गरेको ब्यान्डको दाबी छ । दर्शकको उपस्थिति र आम्दानी दुवै हिसाबले सफल भइरहेको यो कन्सर्ट ब्यान्डले वातावरण संरक्षणका लागि उठाइरहेको आवाज र अन्य पहलहरूका लागि पनि प्रशंसा बटुलिरहेको छ ।