असार २२ मा 'रेडियो कान्तिपुर नेसनल म्युजिक अवार्ड' हुँदै
काठमाडौँ — पाँचौं 'रेडियो कान्तिपुर नेसनल म्युजिक अवार्ड' हुने भएको छ । रेडियो कान्तिपुरले २४औं वार्षिकोत्सवको अवसरमा असार २२ मा कार्यक्रम गर्दै अवार्ड वितरण गर्ने भएको हो ।
२०७८ देखि २०७९ साउनसम्म प्रशारणमा आएका गीतबाट ७५ मनोनयन सार्वजनिक गर्दै त्यसमध्येबाट १५ विधामा अवार्ड वितरण गरिने भएको कार्यक्रम निर्देशक भुपेन्द्र खड्काले बताए ।
उत्कृष्ट नव गायक/गायिका, उत्कृष्ट रचानाकार, उत्कृष्ट संगीत निर्देशक, उत्कृष्ट लोकदोहरी गायक/गायिका, उत्कृष्ट सांगीतिक समूह तथा उत्कृष्ट गायक/गायिकाको विधामा अवार्ड वितरण गरिने भएको हो । दीर्घ साधना अवार्ड (लाइभटाइम अचिभमेन्ट) बाट एक जना संगीतसाधकलाई पुरस्कार रकम एक लाख रुपैयाँ र ट्रफीसहित सम्मान गरिने भएको छ । त्यस्तै पिपल्स च्वइस अवार्डको चयन भने स्रोताको सहभागितामा हुने बताइएको छ ।
कार्यक्रममा गायक/गायिकाहरू स्वप्न सुमन, समीर श्रेष्ठ, सुशान्त केसी, प्रकाश सपुत, शिव परियार, सुवानी मोक्तान, सन्दीप क्षेत्री, सज्जन श्रेष्ठ, गजलकार प्रदीप रोदनको प्रस्तुति रहनेछ । कार्यक्रमको आकर्षणका रुपमा इन्डियन आइडल २०१८ का विजेता सलमान अलीको विशेष प्रस्तुति रहनेछ ।
'हामी स्रष्टाहरूका गीतलाई रेडियोमा बजाउँछौं । यसअर्थमा रेडियोको स्रोत र सम्पत्ति भनेकै गीत/संगीत हुन् । त्यसैले लोकप्रियता र मुनाफा दुवै संगीतकै माध्यमबाट प्राप्त हुने हुँदा यस क्षेत्रको प्रवर्द्धनका गर्नु हामीले आफ्नो कर्तव्य ठानेका छौं । नेपाली संगीत क्षेत्रको श्रीवृद्धिमा इँटा थप्ने काम हो यो अवार्ड,' खड्काले भने ।
प्रकाशित : असार ४, २०८० १६:५८