पूर्वमिस वर्ल्ड मानुषीको फिल्म छायांकन नेपालमा
काठमाडौँ — पूर्वमिस वर्ल्ड मानुषी छिल्लरको नयाँ फिल्म नेपालमा छायांकन गरिएको छ । शक्ति प्रतापसिंहको निर्देशनमा हालै नेपालमा छायांकन गरिएको भिटी १३ (अहिलेका लागि नाम) लाङटाङ, सिन्धुपाल्चोकको जुगल हिमाल सेरोफेरोमा छायांकन गरिएको हो ।
फिल्ममा मानुषीसँगै वरुण तेजको अभिनय छ । फिल्ममा निर्देशक एवं निर्माता फुर्वा शेर्पा नेपालका तर्फबाट लाइन प्रड्युसरका रुपमा जोडिएका छन् । यसअघि थुप्रै अन्तर्राष्ट्रिय प्रोजेक्टमा फुर्वा जोडिसकेका छन् । सिएनएन, नेश्नल जियोग्राफी, एबिसी र लन्डनको स्टोरी टेलर्स प्रोडक्सन कम्पनीका लागि काम गरिसकेका फुर्वा नेपालमा फिल्म छायांकन गर्न फिल्मकर्मीहरु आकर्षित हुन थालेको बताउँछन् ।
'नेपाली फिल्महरु विदेशमा छायांकन गर्न गइरहेका हुन्छन् । तर, अहिले नेपालको प्राकृतिक सौन्दर्य, संस्कृति र सम्पदाले विदेशी फिल्मकर्मीलाई आकर्षित गरिरहेको छ । त्यसैले पछिल्लो समय विदेशीहरु हाम्रो देशमा फिल्म छायांकन गर्नलाई आइरहेका छन्,' फुर्वाले भने, 'नेपाल छायांकन स्थलको रुपमा चर्चित बनिरहेको छ ।'
'भी १३' मा नेपालका सुन्दर हिमालका दृश्यहरु खिचिएको फुर्वाको भनाइ छ । यसअघि फिल्म छायांकनकै लागि बलिउड अभिनेत्री परिणिती चोपडा, बोमन इरानी र अनुपम खेर नेपाल आएका थिए ।
प्रकाशित : चैत्र १०, २०७९ २०:४३
