प्रियंका रानी जोशी बनिन् मिस नेपाल- मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

प्रियंका रानी जोशी बनिन् मिस नेपाल

कान्तिपुर संवाददाता

काठमाडौँ — ‘मिस नेपाल वर्ल्ड २०२२’ उपाधि काठमाडौं निवासी २४ वर्षीया प्रियंका रानी जोशीले हात पारेकी छन् । उनले आमसञ्चार र अंग्रेजी साहित्यमा स्नातक गरेकी छन् । शनिबार हिडन ट्रेजरले ललितपुरको गोदावरीस्थित नवनिर्मित सनराइज कन्भेन्सन सेन्टरमा गरेको ग्रान्ड फिनालेमा २२ प्रतिस्पर्धीलाई पछि पार्दै जोशीले ‘मिस नेपाल वर्ल्ड २०२२’ उपाधि जितेकी हुन् । उनले मिस डिलाइट उपाधिसमेत हात पारिन् ।

ग्रान्ड फिनालेमा २३ प्रतिस्पर्धीमध्ये उत्कृष्ट १२, ६, हुँदै अन्तिम ३ को प्रतिस्पर्धामा जोशी छनोट भएकी हुन् । उपाधिसँगै उनले ‘मिस वर्ल्ड २०२२’का लागि नेपालको प्रतिनिधित्व गर्दै सहभागिता जनाउने छिन् । उनलाई ‘मिस नेपाल २०२०’ नम्रता श्रेष्ठले ‘क्राउन’ पहिराइदिएकी थिइन् ।

त्यस्तै ‘मिस नेपाल अर्थ’ को उपाधि भने संखुवासभाकी २५ वर्षीया सरिशा श्रेष्ठले र ‘मिस नेपाल इन्टरनेसनल’को उपाधि प्रतियोगी विराटनगरकी २४ वर्षिया न्यान्सी खड्काले जितेका छन् । मिस कन्फिडेन्टको उपाधि पनि मिस नेपाल अर्थ श्रेष्ठले नै जितिन् भने ‘मिस पपुलर चोइस’ उपाधि खड्काले हात पारिन् । ‘मिस नेपाल सुप्रानेसनल’ फ्रेन्चाइजलाई भने यस वर्ष निरन्तरता दिइएको छैन ।

त्यस्तै सहउपाधितर्फ ‘मिस ब्युटी विथ पर्पज’ प्रतियोगी स्मारिका शर्मा, रोज कँडेल ‘डाबर अमला मिस ब्युटीफुल हेयर’ र द काठमाडौं पोस्ट ‘मिस इन्टलेक्च्युअल’, ‘फार्मेसी फेस अफ २२’ गंगा गुरुङ, ‘मिस फोटोजेनिक’ ममता ढकाल र ‘मिस ग्ल्यामर’ सोफिया श्रेष्ठ घोषित भइन् ।

यस वर्षको मिस नेपालमा देशभरबाट झन्डै ८ सय जनाले आवेदन दिएका थिए । आवेदकहरुमध्ये १ सय ९६ जना छनोट गरी २३ जना प्रतिस्पर्धीहरु ग्रान्ड फिनालेमा प्रतिश्पर्धाका लागि सहभागी थिए ।

‘मिस नेपाल पेजेन्ट’मा देशभरबाट प्रतिनिधित्व बढाउन सातै प्रदेशमा मुख्य सहरहरु काठमाडौं लगायत वीरगन्ज, धरान, धनगढी, नेपालगन्ज, पोखरा र सुर्खेतमा प्रतिस्पर्धाका लागि अडिसन लिइएको थियो ।

निर्णायक मण्डलमा मिस नेपाल २०१९ कि अनुश्का शर्मा, २०१७ कि मिस नेपाल इन्टरनेसनल नीति शाह, चलचित्र निर्देशक निश्चल बस्नेतसहित शिक्षा, सञ्चार, प्रशासनलगायत क्षेत्रका पुनम घिमिरे, बलराम पाठक, लाक्पा वाग्मो शेर्पा, दीपक थापाजस्ता व्यक्तित्वहरु थिए । यस वर्ष मिस नेपाल सौन्दर्य प्रतियोगिता ६ जना डाक्टर, ३ जना इन्जिनियर, उद्यमी र सञ्चारकर्मी थिए ।

हिडन ट्रेजरका अध्यक्ष दिवाकर राजकर्णिकारले अन्तिम प्रतिस्पर्धीहरुको नाम घोषणा गरेका थिए ।


प्रकाशित : असार ४, २०७९ १९:४७
प्रतिक्रिया
पठाउनुहोस्

चालु अधिवेशनबाट प्रदेशको नाम टुंगिन्छ : मुख्यमन्त्री राई

देवनारायण साह

मोरङ — प्रदेश १ का मुख्यमन्त्री राजेन्द्रकुमार राईले सहमतिमा नभए मतदान प्रक्रियाबाट भए पनि प्रदेशको नाम चालु बजेट अधिवेशनबाटै टुंगिने बताएका छन् । नेकपा एकीकृत समाजवादी मोरङको आयोजनामा शनिबार विराटनगरमा आयोजित जिल्लास्तरीय विस्तारित बैठकमा उनले प्रदेशसभामा प्रतिनिधित्व गर्ने दलभित्रै एक मत नभएकाले भोटिङ प्रक्रियामै भए पनि प्रदेशको नामकरण गर्नुको विकल्प नभएको बताएका हुन् ।

‘प्रदेशसभामा रहेको ठूलो दल एमाले पनि नाम टुंग्याउने विषयमा अग्रसर देखिएकाले यसको नेतृत्व सरकारले लिएर सके सहमतिबाटै नभए भोटिङ प्रक्रियामै नामकरणको विषय टुंगिनेछ । त्यसलाई सबैले स्वीकारेर जानुपर्छ ।’

उनले आगामी आर्थिक वर्षमा प्रदेशको संरचना निर्माणका लागि बजेट विनियोजन गरिएकोले मुख्यमन्त्री, मन्त्री र जिल्लास्थित कार्यालय निर्माणको कार्य अघि बढाइने बताए । उनले विराटनगरमा मुख्यमन्त्री कार्यालय निर्माण हुने बताए ।

मुख्यमन्त्री राईले केन्द्र सरकारले प्रदेशलाई उपेक्षा गरेको गुनासो पोखे । ‘आर्थिक अधिकारदेखि कार्य क्षेत्रमा प्रदेशलाई कमजोर बनाउने काम संघीय सरकारबाट भएको छ,’ उनले भने, ‘पुँजीबिनाको अर्थ मन्त्रालय, प्रहरी र कर्मचारीबिनाको प्रदेश सरकार हुनुका साथै मुख्य सचिवदेखि सचिवसम्मको खटनपटन केन्द्रबाटै हुन्छ । केन्द्रले अधिकार नदिएर प्रदेशलाई उपेक्षा गरेको छ ।’

मुख्यमन्त्री राईले प्रदेशसभामा प्रदेशको नामकरणका लागि दुई तिहाई बहुमत आवश्यक रहेको र त्यो एमालेको साथ र समर्थनबिना सम्भव नरहेको प्रस्ट पारे । प्रदेशको नामकरणमा सहजीकरणका लागि एमाले संसदीय दलले पूर्वआन्तरिक मामिला तथा कानुनमन्त्री हिक्मत कार्कीको नेतृत्वमा ५ सदस्यीय समिति गठन गरेको छ । एमालेले पनि चालु अधिवेशनबाटै प्रदेशको नामकरणका लागि पहल थालेको छ ।

कांग्रेस संसदीय दलको बैठकले पनि प्रदेश नामकरणका लागि अन्तरपार्टी सम्वाद गरी सहमति जुटाउन दलका नेता राजीव कोइरालालाई जिम्मेवारी तोकेको छ । नेता कोइरालालाई चालु अधिवेशनबाटै नामकरणका लागि सहमति जुटाउन जिम्मेवारी दिने दलको बैठकले निर्णय गरेको छ ।

९० सदस्यीय प्रदेशसभामा ५ दलीय सत्तारुढ गठबन्धनमा ५० जना प्रदेश सांसदमात्रै छन् । जसमा कांग्रेसको २१, माओवादी केन्द्रको १५, एकीकृत समाजवादीका १०, जनता समाजवादी पार्टीका ३ र संघीय लोकतान्त्रिक राष्ट्रिय मञ्चका १ प्रदेश सांसद छन् ।

प्रमुख प्रतिपक्षी दल एमालेका ३९ र राप्रपाका १ प्रदेश सांसद छन् । प्रदेशसभाबाट प्रदेशको नाम पारित गराउन आवश्यक ६१ सांसद पुर्‍याउन एमालेको समर्थन अपरिहार्य छ । तर सत्तारुढ गठबन्धन र प्रमुख प्रतिपक्षी दलभित्रकै सांसदहरु प्रदेशको नामकरण भूगोल र पहिचानको आधारमा हुनुपर्नेमा विभाजित छन् । जसले प्रदेश नामकरणको प्रक्रिया अघि बढ्न सकेको छैन ।

प्रकाशित : असार ४, २०७९ १८:५८
पूरा पढ्नुहोस्
प्रतिक्रिया
पठाउनुहोस्
×