कान्समा जाँदै सुरक्षा पन्त- मनोरञ्जन - कान्तिपुर समाचार

कान्समा जाँदै सुरक्षा पन्त

कान्तिपुर संवाददाता

काठमाडौँ — अभिनेत्री सुरक्षा पन्त ‍विश्व प्रसिद्ध फिल्म फेस्टिभल कान्समा सहभागी हुँदै छिन् । मनाङका केही भागमा छायांकन गरिएको विदेशी फिल्म 'द एइट माउन्टेन्स'मा निभाएको एक पात्रको भूमिकाले उनलाई कान्समा पुर्‍याएको हो । 

अवार्ड जितेको उपन्यास 'द एइट माउन्टेन्स'मा आधारित फिल्म कान्समा जेठ ४ गते प्रिमियर हुँदैछ । फेलिक्स भ्यान जोर्जियन र सार्लोट भ्यान्डरमियर्स निर्देशित फिल्मले कान्स पुर्‍याउँदा दंग छिन् सुरक्षा । कान्सको मुख्य प्रतिस्पर्धाका लागि फिल्म छनोट परेको थियो। सुरक्षाले सामाजिक सञ्जाल फेसबुकमा खुसी हुँदै उनी कान्समा सहभागी हुने कुरा सार्वजनिक गरेकी हुन् ।

'कान्स फिल्म फेस्टिभल २०२२ मा जाँदैछु । सबैभन्दा पहिला त जानको लागि जुन दौडधुप गर्नुपर्छ त्यो दौडधुपमा मसँगै दौडिने सहयोगी साथीहरुलाई माया अनि सम्मान छ। केही समयअघि एउटा अन्तर्राष्ट्रिय फिल्ममा एउटा पात्रको रुपमा काम गर्ने मौका जुरेको थियो,' उनले लेखेकी छन्, 'त्यही फिल्म द एइट माउन्टेन्सको केही अंशको छायांकन नेपालको मनाङमा गरिएको थियो। उक्त फिल्म कान्सको मुख्य प्रतिस्पर्धामा छानिएको खबर पाएसँगै निमन्त्रणा आयो अनि जाने तय गरेँ।'

कान्सको अनुभव संगाल्न उनी उत्साहित देखिन्छिन् । पन्तले थप लेखेकी छन्,'मसँग तितोमिठो अनुभव छ जुन कुनै दिन हजुरहरु माझ सुनाउँला, भोलि जाँदैछु। उताको यात्राको पनि मसंग बहुमुल्य अनुभव हुनेछन्।' 'द एइट माउन्टेन्स'का निर्देशक फेलिक्सको फिल्म 'द ब्रोकन सर्कल ब्रेकडाउन' यसअघि ८६ औं अस्करको उत्कृष्ट विदेशी भाषाको फिल्मतर्फ मनोनयनमा परेको थियो ।

प्रकाशित : जेष्ठ ३, २०७९ १२:५६
प्रतिक्रिया
पठाउनुहोस्

नुवाकोट किस्पाङ गाउँपालिका अध्यक्षमा एमाले र उपाध्यक्षमा माओवादी विजयी

कृष्ण थापा

नुवाकोट — नुवाकोटको किस्पाङ गाउँपालिकाको अध्यक्षमा नेकपा एमालेका वीरबल तामाङ र नेकपा माओवादी केन्द्रबाट उपाध्यक्षमा अर्जुन न्यौपाने विजयी भएका छन् । किस्पाङमा एमाले र माओवादीबीचको तालमेलले नेपाली कांग्रेसलाई पराजित गराएको छ । 

अध्यक्षमा वीरबल तामाङले ३ हजार ६३८ मत प्राप्त गरी विजयी भएका थिए भने उनका प्रतिद्वन्द्वी कांग्रेसका छत्र लामाले ३ हजार ४ सय ५२ मत पाएर पराजित भएका थिए । अध्यक्ष तामाङले १ सय ८६ मतले लामालाई पराजित गराए ।

यसैगरी उपाध्यक्षमा न्यौपानेले ३ हजार ७ सय १२ मत ल्याई कांग्रेसकी दिलकुमारी मोक्तानलाई पराजित गराए । मोक्तानले ३ हजार १७७ मत ल्याएकी थिइन् । ५ सय ३५ को मतान्तरले उपाध्यक्षमा न्यौपाने विजयी भएका थिए ।

किस्पाङ गाउँपालिकाको १, ४ र ५ वडामा कांग्रेस, २ र ३ वडामा माओवादी केन्द्रले जितको छ ।

प्रकाशित : जेष्ठ ३, २०७९ १२:४४
पूरा पढ्नुहोस्
प्रतिक्रिया
पठाउनुहोस्
×