कान्तिपुर वेबसाईट
AdvertisementAdvertisement

कान्तिपुर टेलिभिजन र कमेडी च्याम्पियनबीच सहकार्य 

कान्तिपुर संवाददाता

काठमाडौँ — कान्तिपुर टेलिभजनले 'कमेडी च्याम्पियन'को टिमसँग सहकार्य गर्ने भएको छ । सोमबार रियालिटी सोका निर्देशक विशाल भण्डारी तथा निर्मात्राद्वय केकी अधिकारी र रीमा विश्वकर्मा र कान्तिपुर टेलिभिजनका स्टेसन म्यानेजर दिनेश डिसीले ५ वर्षका लागि कार्यक्रम निर्माण र प्रसारणको सम्झौतापत्रमा हस्ताक्षर गरेका छन् । 

थ्री प्रोडक्सन र कान्तिपुरको यो सहकार्य 'कमेडी च्याम्पियन'को छैटौं सिजनसम्मको लागि रहेको दिनेशले बताए । यसअघि 'कमेडी च्याम्पियन'ले कान्तिपुरको समय किनेर कार्यक्रम प्रसारण गर्दै आएको थियो । अब यसको निर्माण पनि कान्तिपुर टिभीकै सहकार्यमा निर्माण हुनेछ ।

'सिजन वान हामीले धेरै आरोह-अवरोहबीच सक्कायौं । त्यतिबेला आउट सोर्सिङ कार्यक्रम थियो भने अब त हामीले हात मिलाएका छौं । दुई कम्पनी मिलेर अझै बृहत कार्यक्रम बनाउने तयारी छ,' सोका निर्देशक भण्डारीले भने ।

कोभिडको प्रभाव हेरेर सकेसम्म चाँडो कार्यक्रम प्रसारण गरिने डिसीले बताए । कोभिडले दर्शकमा परेको मानसिक तनावलाई कार्यक्रमले केही हदसम्म कम गर्ने निर्माताहरु केकी र रीमाले विश्वास लिएको बताए । 'हाँसो दिनु त हाम्रो प्रमुख उदेश्य नै भयो । कोभिडले निम्त्याएको मानसिक तनाव र चिन्तालाई हटाउन कार्यक्रमले भूमिका त अवश्य खेल्नेछ,' केकीले भनिन् ।

प्रकाशित : असार २३, २०७७ २०:१९
प्रतिक्रिया
पठाउनुहोस्

निगम र हिमालय एयरलाइन्सका चालक दलका १४ जना संक्रमित

सुरज कुँवर

काठमाडौँ — विदेशमा अलपत्र परेका नेपाली नागरिकको उद्धार उडानमा संलग्न नेपाल वायुसेवा निगम र हिमालय एयरलायन्सका १४ जना कोरोनाबाट संक्रमित भएका छन् । निगम प्रवक्ता अर्चना खड्काका अनुसार मंगलबारसम्म निगमका ३ पाइलट र ६ जना क्याबिन क्रू (एयरहोस्टेस र फ्लाइट एटेन्डेन्ट) गरी ९ जनामा संक्रमण पुष्टि भएको छ ।

कोरोना पुष्टि भएका उनीहरूलाई मंगलबार दिउँसो बलम्बुस्थित सशस्त्र प्रहरी अस्पताल लगिएको छ । निगमले उद्धार उडानमा जाने चालक दल तथा प्राविधिकका लागि सोल्टी क्राउन प्लाजामा क्वारेन्टाइन बनाएको छ ।

त्यसैगरी, उद्धार उडानमै रहेको हिमालय एयरलायन्सका ५ जनामा पनि संक्रमण पुष्टि भएको छ । मंगलबार एक पाइलट र दुई क्याबिन क्रूमा कोरोना पुष्टि भएको प्रशासन उपाध्यक्ष विजय श्रेष्ठले बताए । यसअघि हिमालयका एक विदेशी पाइलट र नेपाली फ्लाइट एटेन्डेन्टमा संक्रमण पुष्टि भइसकेको छ ।

निगमका ४ वटा विमान उद्धार उडानमा छन् । जसमा विदेशीसहित ५४ पाइलट र सयभन्दा बढी क्याबिन क्रू छन् । उद्धार उडानमा ४ विमान रहेको हिमालयमा ४३ पाइलट र ८० हाराहारी क्याबिन क्रू संलग्न छन् ।

प्रकाशित : असार २३, २०७७ २०:१३
पूरा पढ्नुहोस्
प्रतिक्रिया
पठाउनुहोस्
×