काठमाडौँ — चिसो साँझमा उस्तादलाई पर्खिरहेका दर्शकश्रोता उनको प्रस्तुतिमा रोमाञ्चित बने । यस्तो हुनु स्वाभाविक थियो, किनभने विश्वकै लोकप्रिय तबलावादक जाकिर हुसेन स्टेजमा थिए । उनका औँला मेसिनभन्दा छिटो चलेको देख्दा दर्शकदीर्घा पटकैपिच्छे ताली बजाउन बाध्य भयो ।

जाकिरका जादूयी हात तबलामा यति अभ्यस्त देखिए, उनले घोप्टेर एक पटक पनि बाजातर्फ हेरेनन् । बरु, दर्शकश्रोतासँग आँखा जुधाएर चपलतासाथ तबला बजाइरहे । उनले आधुनिक तथा शास्त्रीय वादनमार्फत समस्त दर्शकश्रोतालाई मन्त्रमुग्ध बनाए ।

भारतीय दूतावासको आयोजनामा जाकिरले करिब दुई दशकपछि मंगलबार काठमाडौंमा प्रस्तुति दिएका हुन् । लैनचौरस्थित दूतावासको इन्डिया हाउस प्रांगणमा उनी आफ्नो पाँच सदस्यीय टोलीसहित उपस्थित थिए । ‘आज जेजे हुन गइरहेको छ, त्यो मेरो मात्र कन्सेप्ट होइन,’ जाकिरले प्रस्तुतिपूर्व भने, ‘म हाम्रो टोलीको बिग बोस होइन । चारमध्ये एक हुँ । हामी सबैलाई समान प्रेमले सुनिदिनुस् ।’

जाकिरसँग सारंगीमा शबिर खान, ढोलकमा नवीन शर्मा र मृदंगमा अनन्त कृष्णन थिए ।

कन्सर्टको सुरुवात शबिरको सारंगीवादनमार्फत गरिएको थियो । उनलाई जाकिरले पछयाए अनि जाकिरपछि नवीन र अन्त्यमा मृदंगसहित अनन्त त्यसमा जोडिएका थिए । चार जनाको जुगलबन्दी बेजोड सुनियो । कोभन्दा को कमझैं भए ।

‘हामी चारै जना फरक पृष्ठभूमिका हौं,’ जाकिरले भने, ‘फरक बाजा बजाउँछौं । हामीले बोल्ने भाषा फरक भए पनि सुनाउने कथा एउटै छ ।’

कन्सर्टका लागि जाकिर समूहले विभिन्न रागरागिनीलाई नौलो किसिमले कोरियोग्राफी गरेको थियो । दर्शकदीर्घामा राजनीतिक व्यक्तित्व, कूटनीतिज्ञ, संगीतकर्मी, साहित्यकारलगायत थिए ।

जाकिरले सन् १९९७ मा बाँसुरीवादक हरिप्रसाद चौरसिया र २००१ मा उस्ताद सुल्तान खानसँग पनि नेपालमा कन्सर्ट गरेका थिए । ‘हाम्रो लागि बाटो खुला राखिदिनुभएकोमा धन्यवाद दिन चाहन्छौं,’ उनले भने, ‘कलाकारका लागि कुनै घेरा निर्माण भएको हुँदैन । हामी सबै कलामार्फत एक ठाउँमा भेला हुन सक्छौं ।’