अमेरिका — नेपाली मूलका युवा नेता अमेरिकाको मेरिल्यान्ड राज्यको हाउस अफ डेलिगेट्स बन्न प्रतिस्पर्धामा उत्रिएका छन् । सन् २००८ देखि अमेरिकामा बसोबास गर्दै आएका सतीश चापागाईं मेरिल्यान्ड राज्यको डिस्ट्रिक्ट ७ (ए)बाट हाउस अफ डेलिगेट्सका लागि चुनावी दौडमा रहेका छन् । 

हाउस अफ डेलिगेट्स चयनका लागि मेरिल्यान्डमा आगामी नोभेम्बरमा हुने चुनावी प्रतिस्पर्धामा उनी डेमोक्रेटिक पार्टीबाट उम्मेदवार बन्न प्राइमरी इलेक्सन (उम्मेदवार छनोटका लागि पार्टीभित्र हुने निर्वाचन)मा प्रतिस्पर्धामा उत्रिएका हुन् । अमेरिकामा प्रत्येक तहको जनप्रतिनिधि उम्मेदवार बन्न पहिलो चरणमा आफ्नो पार्टीभित्र प्राइमरी इलेक्सनमा निर्वाचित भएपछि मात्र सोही पार्टीबाट चुनावी प्रतिस्पर्धामा भाग लिन पाउने प्रावधान छ । 

नोभेम्बरमा हुने हाउस अफ डेलिगेट्स निर्वाचनका लागि डेमोक्रेटिक पार्टीमा प्राइमरी इलेक्सन आगामी जुन २३ मा हुनेछ ।

हाउस अफ डेलिगेट्स उम्मेदवार बन्ने होडमा डेमोक्रेटिकको प्राइमरी इलेक्सनमा सतीशसँगै चार जना प्रतिस्पर्धी चुनावी मैदानमा छन् । चारमध्ये प्राइमरी इलेक्सनमा बढी मत ल्याउने दुई जना उम्मेदवारका लागि डेमोक्रेटिकबाट छनोट हुनेछन् । हालसम्म सतीशसँगै लिडिया ब्राउन, चम बेकर र क्लिभलेन्ड रेनोल्ड जुनियर चुनावी प्रतिस्पर्धामा उत्रिने पक्का भइसकेको छ । 

यीमध्ये बढी मत ल्याउने दुई उम्मेदवारले आगामी नोभेम्बरमा हुने निर्वाचनमा रिपब्लिकन पार्टीका दुई उम्मेदवारसँग प्रतिस्पर्धा गर्ने छन् । निर्वाचनमा प्रतिस्पर्धा गर्ने दुई पार्टीका चार उम्मेदवारमध्ये विजयी हुने २ जना मेरिल्यान्डको डिस्ट्रिक्ट ७ (ए)को सांसद बन्ने छन् । यो क्षेत्रमा ८३ हजार मतदाता छन् । जसमध्ये  ४ प्रतिशत एसियाली मूलका मतदाता रहेका छन् । ८३ हजार मतदातामध्ये ४४.९ प्रतिशत रिपब्लिकन, ३४.७ प्रतिशत डेमोक्र्याक्ट र १८.९  इन्डिपेन्डेन्ट मतदाता रहेको आकलन गरिएको छ ।

पत्रकारिता क्षेत्रबाट आफ्नो करिअर सुरू गरेका सतीश नेपाल प्रेस युनियनको पूर्व केन्द्रीय उपाध्यक्ष हुन् । हाल उनी गैरआवासीय नेपाली संघ (एनआरएनए) अन्तर्राष्ट्रिय समन्वय परिषद्को सल्लाहकारको भूमिकामा समेत छन् । नेपालमा पाल्पा घर भएका उनी विगत चार वर्षदेखि डेमोक्रेटिक पार्टीको केन्द्रीय सदस्यका रुपमा आबद्ध छन् । उनी डेमोक्रेटिकको निर्वाचित केन्द्रीय सदस्य हुन् । डेमोक्रेटिकको प्राइमरी इलेक्सनमा आफ्नो जित हुने र हाउस अफ डेलिगेट्समा आफू रिपब्लिकनको उम्मेदवारसँग प्रतिस्पर्धा गर्न तयार रहेको उनले बताए । 

कान्तिपुरसँग कुरा गर्दै सतीशले नेपाली मूलका अमेरिकी जनताको आवाज बनेर आफू राजनीतिमा होमिएकाले अमेरिका भरका नेपालीको साथ, सहयोग समर्थन आफूमाथि रहेको दाबीसमेत गरे । ‘मैले डेमोक्रेटिकको केन्द्रीय निर्वाचनमा चार हजारभन्दा बढी मत पाएर केन्द्रीय सदस्य जितेको हुँ, म स्वच्छ र निष्पक्ष राजनीतिमा सक्रिय छु,’ उनले भने, ‘मलाई विश्वास छ, डेमोक्रेटिकका सदस्यले मलाई प्राइमरी इलेक्सनमा जिताउने छन् र म स्टेट डेलिगेटका लागि अब्बल उम्मेदवार बन्नेछु ।’