काठमाडौँ — खाडी क्षेत्रमा कार्यरत श्रमिकमध्ये ७८ प्रतिशत विदेशी श्रमिक रहेको तथ्यांक सार्वजनिक भएको छ ।

खाडी देशका सरकार सम्मिलित खाडी समन्वय परिषद् (जीसीसी) को कुवेतमा जारी ११ औं उच्चस्तरीय बैठकमा यो तथ्यांक सार्वजनिक गरिएको हो । जीसीसीभित्र साउदी अरब, संयुक्त अरब इमिरेट्स (यूएई), कतार, कुवेत, ओमन  र बहराइन रहेका छन् । 

खाडीको श्रम बजारमा करिब २ करोड ४६ लाख मानिस कार्यरत रहेकामा १ करोड ९० लाख विदेशी श्रमिक रहेको तथ्यांक सार्वजनिक गरिएको हो । खाडीमा कुन देशका कति श्रमिक छन् भन्ने विस्तृत तथ्यांक भने सार्वजिनक गरिएको छैन । खाडीमा रहेका दूतावासहरुका अनुसार यी ६ देशमा झन्डै १५ लाख नेपाली कार्यरत छन् ।

कुवेतको पब्लिक अथोरिटी फर म्यानपावरका कार्यकारी महानिर्देशक मरजुक अल ओतैबीले विदेशी श्रमिकको बढ्दो दबदबालाई सन्तुलन गर्न चुनौती रहेको भन्दै साझा श्रम रणनीतिलाई अगाडि बढाउन जरुरी रहेको बताए । 

स्थानीय सञ्चारमाध्यमहरुका अनुसार बैठकमा निजी क्षेत्रको रोजगारी, राष्ट्रियकरण, सामाजिक सुरक्षा, श्रम विकास तथा श्रम बजारमा महिलाको सहभागितासँग सम्बन्धित विषयमा छलफल भएको छ ।