लन्डन — बेलायतमा सक्रिय नेपाली समुदायका १० जना सामाजिक व्यक्तित्वलाई ‘वर्ष व्यक्तित्व २०२५’ घोषणा गर्दै सम्मान गरेको छ । आइतबार लन्डननस्थित स्ट्यानवेल कम्युनिटी हलमा आयोजित नेपालब्रिटेन डट कम को १८ औं वार्षिकोत्सवको अवसरमा उनीहरूलाई मिडिया पर्सनालिटी अफ द इयर २०२५ सम्मान प्रदान गरिएको हो ।

यस वर्ष रुबी राउत, डा. विशाल गरुङ, विकास नेपाल, सुनिल खड्का, दिवाकर पाण्डे, महेश अधिकारी, पुरन गिरी, डा. रक्षा थापा, रण केसी र डा. दिलिसा सिम्खडालाई सम्मान गरिएको हो । त्यस्तै, बेलायतमा सक्रिय चारभन्ज्याङ तमू समाज यूकेलाई ‘वर्षको उत्कृष्ट सामाजिक संस्था’ का रूपमा सम्मान गरिएको थियो ।

कार्यक्रममा बेलायतका लागि नेपाली राजदूत चन्द्रकुमार घिमिरे, तमू धीं यूके अध्यक्ष जुमकाजी गुरुङलगायतले सम्मानित व्यक्तित्वहरुलाई खादा र सम्मानपत्र प्रदान गरेका थिए । राजदूत घिमिरेले नेपालको सकारात्मक छवि अन्तर्राष्ट्रिय समुदायमा पुर्‍याउन मिडियाको भूमिका महत्वपूर्ण हुने उल्लेख गरे । ‘नेपाल अब केवल गरिबीले मात्र चिनिने देश होइन, प्रतिभा सम्पन्न मुलुकका रुपमा प्रस्तुत हुनुपर्ने बेला आएको छ’ उनले भने ।