दक्षिण सुडान — बुधबार, माघ शुक्ल पूर्णिमा । स्वस्थानी व्रतकथाको सांगेको दिन । त्यसैले दक्षिण सुडानस्थित प्राविधिक जमदार पविता थापा बिहान चारबजे नै उठिन् । नुहाएर पूजा सामग्री तयार पारिन् । त्यसपछि पूजापाठमा बसिन् । काठमाडौं दहचोककी उनी शान्तिसेनामा दक्षिण सुडान आएको तीन महिना भयो । पुस शुक्लपक्षका दिनदेखि नै विधि पूरा गरेर उनले स्वस्थानी व्रत सुरु गरेकी हुन् । 

‘बिहान ड्युटीमा खटिनुअघि पूजापाठ गर्दै आएकी छु । साँझ ड्युटी सकेर पूजापाठ गर्दै स्वस्थानी कथावाचन गरेपछि खानपिन गर्छु । एक महिना मेरो यही दैनिकी बन्यो,’ उनले भनिन् । ड्युटीमा अप्ठ्यारो नपर्ने गरी पूजापाठ गर्दै आएको उनी सुनाउँछिन् ।

‘नेपालमा हुँदा पनि स्वस्थानीको व्रत लिन्थें,’ थापाले भनिन्, ‘यता आएर पनि ड्युटीमा असर नपर्ने गरी व्रत लिएँ र सबै प्रक्रिया पुर्‍याएर व्रत समाप्ति गरें । स्वस्थानीको किताब र पूजाका सामग्री नेपालबाट आउँदै ल्याएको उनले सुनाइन् । पूजामा जमदार (पण्डित) मधुसूदन ओझाले थापालाई सघाए । 

स्वस्थानीको व्रत सुरु हुँदा र समापनमा क्याम्पमा माछा–मासु नपाक्ने थापाले जनाइन् । ‘यस्तो ठाउँमा कुन बेला के हुन्छ, थाहै हुँदैन,’ उनले भनिन् । ड्युटीमा जति तनाव भए पनि भजनमा बस्दा मन आनन्दित हुने उनको भनाइ छ । उनी एक वर्षसम्म दक्षिण सुडानको दुरूपीमा बस्ने गरी पल्टन आएकी हुन् ।