ईपीएस कामदार नोभेम्बर अन्तिम सातादेखि कोरिया आउन पाउने- प्रवास - कान्तिपुर समाचार
कान्तिपुर वेबसाईट
AdvertisementAdvertisement

ईपीएस कामदार नोभेम्बर अन्तिम सातादेखि कोरिया आउन पाउने

गोकुल थोकर

सोल,दक्षिण कोरिया — दक्षिण कोरियाली सरकारले कोरोना महामारीका कारण २० महिनादेखि रोकिइरहेका रोजगार अनुमति प्रणाली (ईपीएस) अन्तर्गतका कामदारलाई नोभेम्बरको अन्तिम सातादेखि लैजाने भएको छ । यहाँको श्रम मन्त्रालयले शुक्रबार जारी गरेको नयाँ निर्णय अनुसार ईपीएसमार्फत कोरिया आउने १६ वटै देशबाट कामदार ल्याउन लागिएको हो  ।

लामो समयदेखि कोरियामा ईपीएस अन्तर्गत नयाँ कामदार आएका छैनन् । नेपाल लगायतका केही देशबाट कमिटेड कामदार नगन्य मात्रामा आएको भएपनि लामो समयदेखि विदेशी कामदार नआउँदा यहाँको कृषि र उत्पादनमूलक क्षेत्रमा कामदारको अभाव रहँदै आएको छ । प्रत्येक वर्ष ५० हजारभन्दा बढी ईपीएस प्रणाली अन्तर्गत नयाँ तथा कमिटेड कामदार आउने कोरियामा कोरोना संक्रमण बढेसँगै विदेशी कामदार ल्याउन रोकिएको थियो । नेपालबाट पनि प्रत्येक वर्ष ५ हजार भन्दा बढी कामदार कोरिया आउने गर्थे ।

कामदार अभावलाई कम गर्नका लागि कोरियाली सरकारले तीन महिनाको भिसा दिएको थियो । त्यस अवधिमा पनि कोरोना महामारीको कम नभएको भन्दै कोरियामा रहेका ईपीएस अन्तर्गतका भिसा सकिन लागेका कामदारलाई एक वर्षको विशेष भिसा पनि दिएको छ ।

केही सयम अघिदेखि कमिटेड कामदारहरु कोरिया आउन दिने नियम बनाएको भएपनि कोटा प्रणालीमा कामदार कोरिया आउन पाउँथे । कोरोना महामारीविरुद्ध राम्रा काम गरेका नेपाल लगायतका पाँच वटा देशबाट एक दिनमा १ सय र हप्तामा ६ सयभन्दा कम कामदारलाई कोरिया आउने अनुमति थियो । यसै नियमअनुसार कमिटेड नेपाली कामदार पनि कोरिया आइसकेका छन् ।

अहिले कोरियाली सरकारले कोरियामा रहेका ८० प्रतिशत जनताले कोरोनाविरुद्धको पहिलो खोप लगाइसकेको र ७५.५ प्रतिशतले खोपको पूरै मात्रा लगाएको जनाउँदै जनजीवन महामारी अघिकै अवस्थामा फर्काउन खुकुलो नियम ल्याएको छ । ‘लिभिङ बिथ कोभिड–१९’ भन्ने मूल नारासहित खुकुलो नियम लागू भएको छ ।

त्यस्तै यहाँ रहेका अधिकांश नेपालीले पनि कोरोनाविरुद्धको भ्याक्सिन लगाइसकेका छन् । कोरियाली सरकारले यही वर्षको अन्तिमसम्म कोरियामा रहेका सबै नागरिकलाई भ्याक्सिन लगाउने नीति बनाएपछि यहाँ रहेका नेपालीले पनि कोरोना विरुद्धको भ्याक्सिन लगाउन पाउने भएका हुन् ।

यहाँ ४० हजारभन्दा बढी नेपाली रहेका छन् । रोजगार अनुमति प्रणाली (ईपीएस) मार्फत काम गर्न आएका कामदार ३५ हजार भन्दा बढी रहेका छन् भने अध्ययन, व्यवसाय र अन्य पेशामा भएका नेपालीको संख्या ५ हजारभन्दा बढी छन् ।

कुनै शुल्क नलाग्ने भ्याक्सिन कोरियामा ९० दिनभन्दा बढी समय रहेका सबै विदेशीले पनि लगाउन सक्नेछन् । अहिले कोरियामा २० लाखभन्दा बढी विदेशी रहेका छन् ।

प्रकाशित : कार्तिक २०, २०७८ १३:१०
प्रतिक्रिया
पठाउनुहोस्

एमालेले १० औं महाधिवेशनको उद्घाटनमा ५ लाख उतार्ने

कान्तिपुर संवाददाता

काठमाडौँ — दशौं राष्ट्रिय महाधिवेशन उद्घाटनमा नेकपा एमालेले ५ लाख मानिस सहभागी गराउने गरी तयारी सुरु भइसकेको दाबी गरेको छ । 

एमालेको दशौं राष्ट्रिय महाधिवेशन मूल व्यवस्थापन कमिटीले मंसिर १० गते नारायणी किनारामा हुने उद्घाटन कार्यक्रममा वाग्मती र त्यस आसपासका प्रदेशबाट मानिस जुटाउने गरी तयारी सुरु गरेको जनाएको हो । एमालेको मुल व्यवस्थापन कमिटीका सह संयोजक सुरेन्द्र पाण्डेले वाग्मती प्रदेशबाट साढे २ लाख मानिस सहभागी गराउने गरी तयारी भएको बताए ।

पाण्डेले प्रदेश २ कमिटीले १ लाख, लुम्बिनीले ७५ हजार, गण्डकी प्रदेशले ५० हजार र प्रदेश १ बाट २५ हजार सहभागी गराउने निर्णय गरेको बताए । एमालेले उद्घाटनको दिन अहिलेसम्मकै सबैभन्दा ठूलो आमसभामा गर्ने बताउँदै आएको छ ।

'प्रत्येक प्रदेशले बैठकहरु गरेर निश्चित संख्यामा उद्घाटन कार्यक्रममा सहभागी गराउने संख्या निर्धारण गरेको छ । वाग्मती प्रदेशले साढे २ लाख सहभागी गराउने गरी काम सुरु गरिसकेको छ । यसमा यो प्रदेश अन्तर्गतको जिल्लाहरु, सम्पर्क मञ्च तथा जनवर्गीय संगठनहरु पनि पर्छन्,' जन परिचालन समितिको संयोजक समेत रहेका पाण्डेले कान्तिपुरसँग भने,' वाग्मती प्रदेशका सबै वडामा दशौं राष्ट्रिय महाधिवेशन जनपरिचालन कमिटी गठन गरेको काम अघि बढ्ने छ ।'

पाण्डेका अनुसार वाग्मती प्रदेशले पनि विभिन्न जिल्लाहरुलाई उद्घाटन कार्यक्रममा सहभागी हुनेहरुको संख्या निर्धारण गरेको छ । जसअनुसार चितवन जिल्लाबाट ७५ हजार काठमाडौं उपत्यकाबाट ५० हजार, मकवानपुरबाट ३० हजार, धादिङ र सम्पर्क मञ्चबाट २५/२५ हजार, सिन्धुलीबाट १५ हजार, नुवाकोट र काभ्रेबाट १०/१० हजार, सिन्धुपाल्चोकबाट ८ हजार, रामेछाप र दोलखाबाट ५/५ हजार र रसुवाबाट १ हजार सहभागी हुने छन् ।

२२ वटा जनवर्गीय संगठनको गत बिहीबार भएको बैठकले केन्द्रीय सदस्य खिमलाल भट्टराईको नेतृत्वमा केन्द्रीय जनपरिचालन समिति गठन गरेको छ । वाग्मतीले उद्घाटन कार्यक्रममा सहभागिताका लागि कात्तिक २३ गते काठमाडौंमा भेलाको आयोजना गर्दैछ । महाधिवेशनको उद्घाटन एमालेका अध्यक्ष केपी शर्मा ओलीले गर्ने छन् ।

प्रकाशित : कार्तिक २०, २०७८ १२:४०
पूरा पढ्नुहोस्
प्रतिक्रिया
पठाउनुहोस्
×