चीनबाट १०५ जना नेपाली स्वदेश फर्किए- प्रवास - कान्तिपुर समाचार

चीनबाट १०५ जना नेपाली स्वदेश फर्किए

लक्ष्मी लम्साल

बेइजिङ — कोभिड-१९ महामारीका कारण चीनका विभिन्न स्थानमा रोकिएका नेपालीहरू बिहीबार नेपाल फर्किएका छन्। अध्ययनका सिलसिलामा चीनमा रहेका १०५ जना नेपाली विद्यार्थी र अन्य बिहीबार बिहान हिमालय एयरलाइन्सको उडानमार्फत् नेपालका लागि उडेका हुन्।

थ्येनचिन पिनहाइ विमानस्थलमा स्वदेश फर्कन लागेका नेपालीहरु

गत वर्ष डिसेम्बरको अन्त्यतिर चीनको वुहानमा पहिलो पटक कोरोना भाइरसको संक्रमण पाइएपछि त्यहाँ रहेका नेपालीहरूलाई नेपाल एयरलाइन्सको चार्टर्ड उडानमार्फत् नेपाल फर्काइएको थियो। हाल चीनमा कोरोनाको महामारी कमजोर हुँदै गएको छ तर नेपालतर्फ भने संक्रमणको दर उच्च हुँदै गइरहेको छ। यसैकारण नेपाल र चीनले समेत अन्तर्राष्ट्रिय उडानहरू स्थगित गरेका छन्।

अध्ययन सकिएको र भिसाको म्याद पनि सकिन लागेको अवस्थामा धेरै विद्यार्थीसहित केही नेपालीहरू आफ्नै खर्चमा स्वदेश फर्किन लागेका हुन्। अफ्ठ्यारो बेलामा पनि उडान हुन लागेकोले उत्साहित भएका विद्यार्थीहरू चर्को हवाई भाडाले भने निराश भएको बताउँछन्।

हालको हवाई भाडा महामारीअघिको दोहोरो टिकट काटेभन्दा पनि महँगो हो। बेइजिङस्थित फरेस्ट्री युनिभर्सिटीबाट ग्राजुएट भएकी लक्ष्मी धमलाले बाध्य भएर महँगो टिकट लिएको बताइन्। उनले भनिन्, ‘पढाइ पनि सकियो, भिसा म्याद पनि सकिन लाग्यो। अब बल्लतल्ल हुन लागेको उडानबाट नफर्किनुको विकल्प पनि रहेन।’

बेइजिङस्थित नेपाली दूतावासका कार्यवाहक राजदूत सुशील लम्सालले विद्यार्थीसहित १०५ जना नेपाली यस उडानबाट फर्किएको र अझै बाँकी १०० भन्दा बढी विद्यार्थीहरूको ग्राजुएसनको प्रतीक्षामा रहेको बताए। उनले भने, ‘कतिपय विद्यार्थीको दीक्षित हुने समय बाँकी रहेकाले अर्को उडानका लागि पनि पहल गर्नुपर्ने देखिन्छ।’

थ्येनचिनस्थित मेडिकल युनिभर्सिटीबाट अध्ययन पूरा गरेर फर्किन लागेका भरतपुरका शशांककुमार सिंहले हवाई भाडा सस्तो वा महँगो भन्दा पनि कोभिड-१९ को जटिल परिस्थितिमा उडान व्यवस्थापन हुनु नै ठूलो राहत भएको बताए। नेपालमा लकडाउन खुलेपछिको उडानका लागि चिनियाँ एयरलाइन्सहरूले पनि अग्रिम टिकट बुकिङ गरिरहेका छन्। त्यो पनि तुलनात्मक रूपमा महँगो नै छ। एमबीबीएस, एमडी डा.सिंहले भने, ‘कतिपय विद्यार्थीहरूको ग्राजुएसनको समय आउँदैछ। थप अर्को उडानको लागि पनि नेपालले तयारी गर्नुपर्नेछ।’

महामारीका कारण पूर्ण क्षमतामा उडाउन नपाइने भएकाले एयरलाइन्सहरूलाई पनि यतिखेर दबाब छ। हिमालय एयरलाइन्स श्रोतले भन्यो, ‘पहिलेको जस्तो अवस्था छैन। विभिन्न सावधानी अपनाएर ‘फुल क्यापासिटी’ उडाउन नपाइने अर्थात् ७५ प्रतिशत मात्रै यात्रु ओसार्न पाइने र सुरक्षा सतर्कतामा पनि खर्च हुने भएकाले एयरलाइन्सलाई पनि सहज छैन।’

नेपाल फर्किनका लागि नेपाली दूतावासले भर्न लगाएको फारममा दुई सय भन्दा बढीले विवरण टिपाएका थिए।

प्रकाशित : असार २५, २०७७ ०९:३८
प्रतिक्रिया
पठाउनुहोस्

सुदूरपश्‍चिममा ९ वर्षमुनिका संक्रमित २८९ जना

मोहन बुढाऐर

धनगढी — धनगढी  बाजुराको बुढीगंगा–१ का दुई वर्षीय बालकको जेठ १८ गते कोरोना संक्रमणबाट ज्यान गयो । भारतबाट फर्केका ती बालक र उनकी आमालाई कोरोना संक्रमण देखिएको थियो ।


बाजुरा अस्पतालमा आमाले कोरोना जिते पनि काखको छोरो गुमाएकी थिइन् । भारतबाट फर्केकी बुढीगंगाकै एक महिलाले क्वारेन्टाइनमै बच्चा जन्माइन् । उनी र चार दिनको शिशुको पीसीआर जाँच गराउँदा जेठ २९ मा कोरोना पुष्टि भयो ।

सुदूरपश्चिममा बुधबारसम्म ३ हजार ७ सय १७ जनामा कोरोना पुष्टि भएको छ । तीमध्ये ४ दिनका शिशुदेखि ९ वर्षमुनिका २ सय ८९ जनामा अभिभावकसँगै संक्रमण देखिएको छ । प्रदेश स्वास्थ्य निर्देशनालयका अनुसार सुदूरपश्चिममा १० देखि १९ वर्षसम्मका ४ सय ७३ जना संक्रमित छन् । उनीहरूमध्ये आधाजसो अस्पताल, स्वास्थ्य केन्द्र र स्थानीय तहका आइसोलेसनबाट घर फर्केका छन् । आधाजति अहिले पनि कोरोनासँग लडिरहेको प्रदेश स्वास्थ्य निर्देशक डा. गुणराज अवस्थीले बताए ।

भारतमा रोजगारी गुमेर घर फर्किरहेकाहरूले सावधानी अपनाउन नसक्दा महिला र बालबालिका कोरोनाको चपेटामा परेको उनले बताए । जेठ ७ मा भारतबाट घर फर्कने नेपालीका लागि नाका खुला गरेयता डेढ लाख नेपाली सुदूरपश्चिममा फर्केका छन् । यसमा ठूलो संख्या महिला र बालबालिकाको छ । निर्देशक डा. अवस्थीले संक्रमितमध्ये बालबालिका, गर्भवती, सुत्केरी र वृद्धवृद्धालाई कोरोनासँग लड्न मुस्किल परिरहेको बताए ।

प्रकाशित : असार २५, २०७७ ०९:२५
पूरा पढ्नुहोस्
प्रतिक्रिया
पठाउनुहोस्
×