कतारमा एकैदिन ५ हजार २ सय ३५ जना डिस्चार्ज, निको हुने अधिकांश नेपाली

होम कार्की

काठमाडौँ — कतारमा शनिबार मात्रै ५ हजार २ सय ३५ जना कोरोना संक्रमित निको भएका छन् । निको हुनेमा अधिकांश नेपाली कामदार छन् ।

कतारको जनस्वास्थ्य मन्त्रालयले पछिल्लो २४ घण्टाको नतिजा अनुसार यो निको हुनेको यो संख्या हालसम्म कै उच्च संख्या हो । संक्रमितमध्ये १९ देखि ४० वर्षका युवा कामदार रहेकोले निको हुनेको संख्या पनि उच्च देखिएको हो । कतारमा हालसम्म २५ हजार ८ सय ३९ जनालाई निको भइसकेको छ ।

‘क्‍वारेन्टाइनमा बसेको ४० दिनपछि निस्कन पाए । दुईपटकको परीक्षण गर्दा नेगेटिभ आयो । क्‍वारेन्टाइनबाट निस्केर गाडीमा राखिएको थियो । म बसेको गाडीमा सबैजना नेपाली थिए,’ बाग्लुङका ३४ वर्षीय एक नेपालीले भने,‘कोरोनालाई जितेर निस्कदा सबैजना उत्साहित देखिन्थे । हामीलाई युद्ध मैदानबाट घर फर्केको जस्तो लागेको छ ।’

निको भएर निस्केकालाई १५ दिनसम्म क्याम्पमै बस्न समेत निर्देशन दिइएको उनले बताए । ‘यताउता नजानु भनेको छ । कसैलाई नभेट्नु भनेको छ । दुई हप्ता कम्पनीकै क्याम्पमै बस्नेछु,’ उनले भने ।

शनिबार नै थप २३ सय ३५ जनालाई कोरोना पोजिटिभ देखिएको छ । ५ हजार ९१ जनाको स्वास्थ्य परीक्षण गरिएकोमा यो संख्यामा पोजिटिभ देखिएको हो । जनस्वास्थ्य मन्त्रालयका अनुसार २९ हजार ३ सय ८७ जना क्‍वारेन्टाइन र अस्पतालमा उपचाररत छन् ।

मे १९ सम्मको रिपोर्ट अनुसार ६ हजार ९ सय ११ जना नेपाली कामदारलाई कोरोना पोजिटिभ देखिएको हो । कतारमा संक्रमित हुने समुदायमा नेपाली दोस्रोमा पर्छ । सबैभन्दा बढी भारतीय समुदाय देखिएको छ । मृत्युदर भने एकदमै कम छ । हालसम्म ३६ जनाको मृत्यु भएको छ । जसमा ३ जना नेपाली कामदार रहेका छन् ।

राष्ट्रिय महामारी प्रतिरोधक समितिका अध्यक्ष अब्दुल्ला हतीफ अलखलले खाडी क्षेत्रमै कतारले स्वास्थ्य परीक्षण दर बढाएकोले कोरोनाबाट संक्रमित संख्या बढेको देखिएको बताए । ‘कतारमा खाडीमै संक्रमणदर तुलनात्मक रुपमा बढिरहेको छ । आक्रमक रुपका सर्म्पक व्यक्तिको पहिचान भइरहेको छ । कतारले संक्रमित व्यक्तिको जालोलाई बृहत रुपमा अनुसन्धान गरिरहेको छ ।

सबैको परीक्षण भइरहेको छ । धेरै देशले यो गर्न सकेको छैन,’ उनले भने,‘नयाँ पहिचानले धेरै केश देखिइएको हो । शारीरिक र सामजिक दुरी कायम नहुँदा संक्रमितको संख्या बढिरहेको हो ।’

कतारका लागि नेपाली राजदूत नारदनाथ भारद्धजले कतारले हार्दिकताका साथ सबै बिरामीलाई आफ्नो नागरिक सरह उपचार गरिरहेको बताए । ‘बिना भेदभाव अन्तर्राष्ट्रिय स्तरको उपचार भइरहेको छ । जसले गर्दा निको हुने संख्या पनि बढिरहेको हो । निको हुने पछिल्लो नतिजाले समुदायमा ठूलो हर्ष बढाएको छ,’ उनले भने ।

प्रकाशित : जेष्ठ १७, २०७७ १९:१०
प्रतिक्रिया
पठाउनुहोस्

क्‍वारेन्टाइनको बिजोग, बेन्‍चमै सुत्छन् भारतबाट फर्किएका नागरिक

राजबहादुर शाही

मुगु — गमगढीस्थित महाकाली माध्यमिक विद्यालयमा न पिउने पानीको सुविधा छ न व्यवस्थित शौचालय । छायाँनाथरारा नगरपालिकाले विद्यालयलाई क्‍वारेन्टाइन बनाएपछि भारतबाट फर्किएका १२ जनालाई राखिएको छ । भरपर्दो व्यवस्थापन नहुँदा उनीहरु बेन्‍चमा एकसरो कपडा ओछ्याएर सुत्दै आएका छन् । 

क्‍वारेन्टाइनमा ३ महिला र ९ पुरुष छन् । ‘बेन्चमा सुत्दा दिनभरि ढाड दुख्छ,’ एक महिलाले भनिन्, ‘भुइँमा कार्पेट छैन, रातभरि चिसोले सुत्नै सकिन्न ।’ शुक्रबार पानी परेकाले जाडो बढेको उनले गुनासो गरिन् । विद्यालयमा पर्याप्त खानेपानी सुविधा नहुँदा क्‍वारेन्टाइनमा बसेदेखि नै सरसफाइका काम गर्न नपाएको उनको भनाइ छ ।

उनी ५ दिनदेखि क्‍वारेन्टाइनमा बसिरहेकी छिन् । ‘शौच गर्न पनि लाइन बस्नुपर्ने बाध्यता छ, बरु होम क्‍वारेन्टाइनमा राखिए सुरक्षित हुन्थ्यौं,’ उनले भनिन्, ‘अहिलेसम्म चेकजाँचका लागि स्वास्थ्यकर्मी आएका छैनन् ।’ एउटै कोठामा ५ जनालाई राखिँदा सुरक्षित महसुस गर्न नसकिएको उनको गुनासो छ ।

क्‍वारेन्टाइनमा बसेकाहरु केही दिन चिउरा र चाउचाउकै भरमा थिए । शुक्रबारदेखि छायाँनाथरारा नगरपालिकाले खाना र खाजाको व्यवस्था गरेको छ । सदरमुकामकै क्‍वारेन्टाइन व्यवस्थित नहुँदा आफूहरुले धेरै सास्ती भोग्नुपरेको भारतबाट फर्किएकाको गुनासो छ । चारवटै स्थानीय तहले क्‍वारेन्टाइन व्यवस्थापनमा ध्यान दिन नसकेको नागरिक अगुवा कृष्ण शाहीले बताए । ‘सामान्य पूर्वाधार पनि छैनन्,’ उनले भने, ‘स्थानीय तहले सबैलाई एउटै क्‍वारेन्टाइनमा हुल्दा कोरोनाको संक्रमण भयावह हुने देखियो ।’

प्रदेश सरकारले जिल्लाभरिका क्‍वारेन्टाइन व्यवस्थापन गर्न मुगुका स्थानीय तहलाई २० लाख रुपैयाँ बजेट निकासा दिएको छ । प्रमुख जिल्ला अधिकारी कृष्णकुमार निरौलाले क्‍वारेन्टाइनको व्यवस्थापन प्रभावकारी बनाउन स्थानीय तहलाई आग्रह गरिएको बताए । ‘क्‍वारेन्टाइन निर्माण र व्यवस्थापनको जिम्मा स्थानीय सरकारकै हो,’ उनले भने, ‘अनुगमनका क्रममा देखिएका कैफियत सुधार्न पालिकाहरुलाई अनुरोध गरिरहेका छौं ।’

जिल्ला विपद् व्यवस्थापन समितिको कोषमा पनि ५० लाख रुपैयाँ मौज्दात छ । तर निर्देशिका नहुँदा कोषको रकम खर्च गर्न समस्या भएको प्रजिअ निरौलाले गुनासो गरे । उनका अनुसार मुगुमा २१ ठाउँमा ३ सय ७६ बेडको क्‍वारेन्टाइन निर्माण गरिएको छ ।

प्रकाशित : जेष्ठ १७, २०७७ १८:४८
पूरा पढ्नुहोस्
प्रतिक्रिया
पठाउनुहोस्
×