मलेसियामा थप तीन नेपाली संक्रमित

गैरकानुनी हैसियतमा रहेका कामदारलाई कोभिड परीक्षण नगरी जथाभावी धरपकड गर्दा संक्रमण बढेको अधिकारीहरूले बताएका छन् ।
होम कार्की

काठमाडौँ — मलेसियामा गैरकानुनी हैसियतका कामदार राख्न बनाइएका डिपोर्टेसन सेन्टर (घरफिर्ती केन्द्र) मा रहेका ३ नेपालीसहित २२७ जनालाई कोरोना संक्रमण देखिएको छ । 

मलेसिया अध्यागमन विभागका अनुसार सेमेन्ही, वुकित जलिल र सेपाङस्थित कारागार र डिपोर्टेसन सेन्टरमा राखिएकाहरू संक्रमित भएका हुन् । जसमा ३ नेपाली, ५३ बङ्गलादेशी, ४१ भारतीय, ३८ इन्डोनेसियाली र बाँकी अन्य देशका छन् ।

यससँगै मलेसियामा कोरोना संक्रमित नेपालीको संख्या ६६ पुगेको छ । यीमध्ये १३ जना निको भइसकेका छन् । मलेसियाले महामारीको समयमा मे १ देखि गैरकानुनी हैसियत भएका कामदारलाई धरपकड गर्न थालेको हो । अधिकारवादीहरूले कोभिड परीक्षण नगरी जथाभावी धरपकड गर्दा संक्रमण बढेको बताएका छन् ।

संयुक्त राष्ट्रसंघले समेत महामारीका बीच आप्रवासी कामदारप्रति भेदभाव तथा घृणा फैलाउने काम गरेको भन्दै मलेसियालाई सजग गराइसकेको छ । संयुक्त राष्ट्रसंघका मानवअधिकारसम्बन्धी विशेष समाधीक्षक (स्पेसल र्‍यापोर्टर) फिलिप गोन्जालेज मोरालेसले धरपकडले महामारी नियन्त्रणका लागि भइरहेको प्रयासलाई ओझेलमा पारेको बताएका छन् । ‘धरपकडले आप्रवासी कामदारलाई तर्साउने काम भएको छ । आप्रवासी कामदार कोभिडको कुनै लक्षण देखिए पनि परीक्षण गराउन आउने स्थिति छैन’, उनले जारी गरेको विज्ञप्तिमा उल्लेख छ ।

मलेसियामा गैरकानुनी हैसियतमा झन्डै २५ हजार नेपाली छन् । त्यहाँको सरकारले आवागमन नियन्त्रण (एमओसी) समाप्त भएको १४ दिनभित्र स्वदेश फिर्न सार्वजनिक सूचना जारी गरेको छ । एमओसीको अवधि आगामी जुन ५ सम्म छ ।

प्रकाशित : जेष्ठ १३, २०७७ ११:२९
प्रतिक्रिया
पठाउनुहोस्

क्वारेन्टाइन नियम उल्लंघन गर्दा दक्षिण कोरियामा एक युवकलाई ४ महिना जेल

एजेन्सी

सोल — क्वारेन्टाइनको नियम पटक पटक उल्लंघन गरेको भन्दै दक्षिण कोरियाको एक अदालतले एक युवकलाई चार महिना जेल सजाय सुनाएको छ ।

दक्षिण कोरियामा क्वारेन्टाइनको नियम उल्लंघन गरेको मामिलामा पहिलो पटक जेल सजाय सुनाइएको हो । किम नाम गरेका ती युवक क्वारेन्टाइन अवधि पूरा हुनुभन्दा २ दिन पहिले नै आफ्नो घरबाट बाहिर निस्किएका थिए । त्यहाँबाट क्वारेन्टाइन केन्द्र लैजाने क्रममा उनी भाग्ने प्रयास गरेका थिए ।

दक्षिण कोरियाका कैयौं नाइटक्लबमा कोरोना संक्रमण बढ्दै गएपछि सरकारले क्वारेन्टाइन नियम उल्लंघन गर्नेलाई कडा कारबाही गर्ने नीति अपनाउने विषयमाथि विचार गरिरहेको जनाएको छ ।

दक्षिण कोरियामा हालसम्म ११ हजार २ सय २५ जनामा कोरोना भाइरसको संक्रमण पुष्टि भएको छ । त्यसमध्ये १० हजार २ सय ७५ जना निको भएका छन् । दक्षिण कोरियामा कोरोना संक्रमणबाट हालसम्म २ सय ६९ जनाको मृत्यु भएको छ । दक्षिण कोरियामा सरकारले चालेका प्रभावकारी कदमका कारण अहिले संक्रमण नियन्त्रणउन्मुख रहेको बताइएको छ ।

प्रकाशित : जेष्ठ १३, २०७७ ११:०८
पूरा पढ्नुहोस्
प्रतिक्रिया
पठाउनुहोस्
×