उदयपुर —  

उदयपुरको उदयपुरगढी गाउँपालिका–३ साइपामा रहेको परेवा झरना पछिल्लो समय आन्तरिक पर्यटकको आकर्षक गन्तव्यका रूपमा परिचित बन्दै गएको छ। घना जंगल र विशाल पहाडको काखमा अवस्थित यो झरनाले प्राकृतिक सौन्दर्यसँगै धार्मिक आस्थाको केन्द्रका रूपमा पनि पहिचान बनाएको छ।

वडाध्यक्ष मनोज कार्कीका अनुसार पहाडको काखबाट छङछङ गर्दै झर्ने परेवा झरना करिब ९० फिट अग्लो छ। झरनाले बनाएको दह, वरपरको हरियाली वातावरण र शान्त प्राकृतिक परिवेशले यहाँ पुग्ने पर्यटकलाई लोभ्याउने गरेको छ। पछिल्लो समय झरना अवलोकन गर्न स्थानीयसँगै अन्य जिल्लाबाट आउने आन्तरिक पर्यटकको संख्या पनि बढ्दै गएको छ।

पर्यटकको सहजताका लागि झरनासम्म पुग्ने सिँढी तथा अवलोकन स्थल निर्माण गरिएको छ। झरनाको प्राकृतिक दृश्यावलोकनका लागि आवश्यक आधारभूत संरचना विस्तार गर्दै लगिएको वडाध्यक्ष कार्कीले बताए। 'झरनासम्म पुग्न सिँढी र झरना अवलोकन गर्ने ठाउँमा रेलिङसमेत लगाइएको छ,' उनले भने।

प्राकृतिक आकर्षणसँगै यो क्षेत्र धार्मिक आस्थासँग पनि जोडिएको छ। झरनाको माथिल्लो भागमा रहेको देवस्थलप्रति स्थानीयको गहिरो विश्वास रहेको स्थानीय शुक्रबहादुर थापा मगरले बताए। पौराणिक कालमा त्यहाँ शक्तिशाली झाँक्री बस्ने गरेको र उसको दैविक शक्ति अझै कायम रहेको जनविश्वास छ। स्थानीय समुदायले अहिले पनि देवताको नाममा भाले चढाउने परम्परालाई निरन्तरता दिएका छन्। कुनै नयाँ वा ठूलो काम गर्नुअघि देवतालाई सम्झेर भाले चढाउने चलन रहेको उनी बताउँछन्। निःसन्तान दम्पतीले भाकल गरे सन्तान प्राप्ति हुने र विभिन्न मनोकामना पूरा हुने विश्वास रहेको स्थानीय घमानबहादुर थापा मगरको भनाइ छ।

भिरालो स्थानमा रहेको पुरानो महादेवथानमा पुग्न कठिन भएपछि तल समथर स्थानमा मन्दिर निर्माण गरी त्यसको छेउमा शिवजीको ठूलो मूर्ति स्थापना गरिएको छ। धार्मिक तथा पर्यटकीय गतिविधिलाई थप व्यवस्थित बनाउन पार्क, विश्रामस्थललगायतका संरचना निर्माणको कामसमेत अघि बढाइएको छ।