सुर्खेत — कर्णाली राजमार्गअन्तर्गतको कालीकोट खण्डमा सडक कालोपत्र मर्मतका लागि एमके/अमित जेभीले सडक डिभिजन कार्यालय जुम्लासँग २०७६ माघ २६ गते ठेक्का सम्झौता गर्‍यो ।

एक वर्षभित्र सडक निर्माणको काम सक्नेगरि ३ करोड ३८ लाख रुपैयाँमा ठेक्का लिएको कम्पनीले ८१ लाख रुपैयाँ पेश्कीसमेत लिइसकेको थियो । तर दुईपल्ट म्याद थप्दा पनि सडक निर्माणमा २० प्रतिशत कामसमेत सम्पन्न नगरेको भन्दै सडक डिभिजन कार्यालयले ठेक्का सम्झौता रद्द गरेको छ ।  

एमके/अमित जेभीले नै २०७७ चैत १९ मा एक वर्षभित्र दहीखोला–सेरीघाट खण्डमा कालोपत्र मर्मतका लागि ठेक्का सम्झौता गर्‍यो । ३ करोड २० लाख रुपैयाँमा ठेक्का लिएको कम्पनीले एकपल्ट म्याद थप गर्दा पनि ३० प्रतिशत कामसमेत नसकेपछि उक्त सडकको ठेक्का पनि तोडिएको छ । 

सडक डिभिजन कार्यालयले जुम्लाले कर्णाली राजमार्गअन्तर्गत लामो समयदेखि अलपत्र परेका १६ वटा ठेक्काको सम्झौता तोडेको हो । कार्यालयले दुई महिनाअघि पनि राजमार्गकै १० वटा रुग्ण ठेक्का तोडेको थियो ।

कार्यालयका सूचना अधिकारी सौरभकुमार सिंहका अनुसार ठेक्का तोडिएका योजनाहरु आर्थिक वर्ष २०७४/७५ देखिका हुन् । ‘निर्माण कम्पनीलाई पटकपटक लिखित ताकेता गर्दासमेत काममा चासो नदेखाएपछि सार्वजनिक खरिद कानुनमा भएको व्यवस्थाअनुसार ठेक्का रद्द गरिएको हो,’ उनले भने, ‘हामीले सार्वजनिक सूचना जारी गर्दै कालीकोटका १२, जुम्लाका ३ र मुगुका एक गरी १६ वटा ठेक्का अन्त्य गरेका छौं ।’

उनका अनुसार निर्माण व्यवसायीहरुमा लामो समयदेखि ठेक्का लिने तर काम नगर्ने प्रवृति देखिएको छ । ती कम्पनीहरुलाई कालोसूचीमा राख्ने, जमानत र धरौटी बापतको रकम जफत गर्ने तथा पेस्की रकम १० प्रतिशत ब्याजसहित असुल गर्नेलगायत कारवाही प्रक्रियासमेत अघि बढाइएको उनले जानकारी दिए । 

सडक डिभिजनका अनुसार एमके/अमित जेभीसँका चार र कालीकोटको कर्णाली कन्ट्रक्सन एण्ड इन्जिनियरिङसँगका तीनवटा ठेक्का सम्झौता तोडिएको छ । त्यस्तै आर्थिक वर्ष २०७४/७५ मा कालीकोटको सेरी–पान्तडी बेलीब्रिज निर्माणको ठेक्का लिएको जुम्लाको हिमाली निर्माण सेवा, आर्थिक वर्ष २०७७/७८ मा नाग्मा–जुम्ला खण्डमा सडक निर्माणको ठेक्का लिएको जुम्लाको नारायण निर्माण सेवा र आर्थिक वर्ष २०७८/७९ मा ताल्चा–रारा खण्डको ठेक्का लिएको नञ्जिला एण्ड आकांक्षा/मजदुर जेभीसँगको ठेक्का पनि रद्द गरिएको छ । 

आर्थिक वर्ष २०७९/८० मा दहीखोला–खुलालु सडक निर्माणको जिम्मा लिएको कालीकोटको हिमांशु निर्माण सेवा, २०८० मा नाग्मा–खलंगा खण्डको नाला मर्मतको ठेक्का लिएको जुम्लाको मालिका कन्ट्रक्सन र कालीकोट–माल्कोट सडक निर्माणको जिम्मा लिएको हुम्लाको छ्याछहरा निर्माण निर्माण सेवासँग पनि सम्झौता तोडिएको सूचना अधिकारी सिंहले बताए । 

उनका अनुसार कार्यालयले गत आर्थिक वर्षमा घट्टेगाड–गेला–पदमघाट सडक स्तरोन्नतिको जिम्मा लिएको कालीकोटको सिंह/कालिका निर्माण सेवा, कर्णाली राजमार्गको खुलालु–नाग्मा खण्डमा सेफ्टी बार निर्माणको जिम्मा लिएको सुर्खेतको मालिका विल्डर्स र तल्लो डुंगेश्वरदेखि खलंगासम्मको सडक मर्मतको जिम्मा लिएको जुम्लाको लक्ष्मी निर्माण सेवासँगको ठेक्का पनि अन्त्य गरेको छ । उनले यो वर्ष मात्रै २६ वटा रुग्ण ठेक्काको सम्झौता तोडिएको जानकारी दिए । 

सडक स्तरोन्नतिको काम अलपत्र पर्दा स्थानीयले लामो समयदेखि सास्ती भोग्दै आइरहेका छन् । विश्व बैंकको १ अर्ब रुपैयाँ सहयोगमा २०७२ सालमा गरिएको अधिकांश कालोपत्र उप्किएपछि सामान्य पानी पर्दा पनि हिलाम्मे र घाम लाग्दा धुलाम्मे सडकमा कष्टकर यात्रा गर्नुपरेको कालीकोटको खाँडाचक्र नगरपालिका प्रमुख कमलबहादुर शाहीले बताए । उनका अनुसार अधिकांश ठाउँमा एक लेनको मात्र सडक हुँदा घण्टौं जाम हुने समस्या छ । कमजोर भूगोल भएकाले पहिरोको जोखिम उत्तिकै रहेको उनले जानकारी दिए ।