पर्सा — मुलुककै सबैभन्दा बढी राजस्व संकलन गर्ने वीरगन्ज भन्सार कार्यालयको बेरुजु रकम १० अर्ब रुपैयाँभन्दा बढी पुगेको छ।

आयात–निर्यात कारोबारसँग सम्बन्धित विभिन्न प्रकरणमा असुल गर्नुपर्ने रकम वर्षौंसम्म फर्छ्योट हुन नसक्दा बेरुजुको आकार बढ्दै गएको कार्यालयले जनाएको छ।

वीरगन्ज भन्सार कार्यालयका प्रमुख भन्सार प्रशासक कृष्णप्रसाद मैनालीका अनुसार आयात तथा निर्यातकर्ताले आवश्यक कागजात र प्रमाण पूरा नगरी बैंक ग्यारेन्टीका आधारमा मालवस्तु छुटाउने गरे पनि पछि बेरुजु फर्छ्योटका लागि नआउँदा समस्या जटिल बन्दै गएको हो। ‘कतिपय कन्साइनमेन्टमा वस्तुको सही वर्गीकरण गरिएको हुँदैन, कतिपयमा आवश्यक कागजात नै संलग्न हुँदैनन्,’ मैनालीले भने, ‘त्यस्तो अवस्थामा बैंक ग्यारेन्टी राखेर कारोबार सम्पन्न गरिन्छ। तर पछि सम्बन्धित व्यवसायी बेरुजु फर्छ्योट गर्न आउँदैनन्।’

उनका अनुसार यस्तो समस्या विशेषगरी सवारी साधन आयातसँग सम्बन्धित कारोबारमा बढी देखिएको छ। आयातकर्ताले पेश गरेको प्रज्ञापनपत्र र वास्तविक रूपमा भित्रिएको सवारी साधनबीच फरक पाइने गरेको उनको भनाइ छ। ‘डिजेल इन्जिन भएको भनेर घोषणा गरिएको सवारी पेट्रोल इन्जिनको हुने, सानो आकारको भनेर विवरण दिइएको सवारी ठूलो आकारको हुने तथा कम सिट क्षमताको भनेर उल्लेख गरिएको सवारीमा बढी सिट क्षमता हुनेजस्ता अवस्था भेटिएका छन्,’ उनले भने।

यस्ता विषयमा राजस्व निर्धारण तथा असुली प्रक्रिया पूरा नभएपछि रकम बेरुजुका रूपमा रहने गरेको उनले बताए। प्रत्येक वर्ष महालेखा परीक्षकको कार्यालयले समेत यस्ता प्रकरणलाई बेरुजुका रूपमा औंल्याउने गरेको र त्यसले बेरुजुको रकम थपिँदै गएको मैनालीको भनाइ छ।