लमजुङ — लमजुङका ग्रामीण भेगमा धान रोपाइँ सुरु भएको छ । क्व्होलासोथार गाउँपालिका–४, भुजुङको घिम्चेफाँट, वडा नं ५, सिङ्दीको तम्रखेतका साथै मर्स्याङ्दी गाउँपालिका–५, घेर्मुफाँटमा किसानले धान रोपाइँ थालेका हुन् ।

सिँचाइ सुविधा पुगेको र पानी पनि पर्न थालेसँगै किसानले धान रोपाइँ सुरु गरेका हुन् । भुजुङका यमबहादुर गुरुङले घिम्चेफाँटमा शनिबारदेखि धान रोपाइँ सुरु भएको बताए । उनका अनुसार गाउँलेले तामरे (ताक्मरे) प्रजातिको धान रोप्न थालेका छन् । स्थानीय जातको ताक्मरे धान भुजुङमा मात्र खेती गर्ने गरिएको गाउँलेको दाबी छ । स्थानीय तुलबहादुर गुरुङका अनुसार घिम्चे खेतमा सिँचाइको व्यवस्था रहेकाले जेठ अन्तिमसम्म आधाभन्दा बढी खेतमा धान रोपिसकिन्छ ।

क्व्होलासोथार गाउँपालिका–५ का वडाध्यक्ष गीतबहादुर गुरुङले सिङ्दीमा आइतबारदेखि रोपाइँ सुरु भएको बताए । सोमबारदेखि धमाधम रोपाइँ भइरहेको छ । स्थानीय वर्तमाया गुरुङले गाउँमा रोपाइँ सुरु भएको र सामूहिक रूपमा धान रोपाइँ थालिएको बताइन् ।

घेर्मुफाँटकी धनकुमारी गुरुङका अनुसार सोमबारदेखि घेर्मुफाँटमा धान रोपाइँ सुरु भएको छ । गाउँले किसान सबै जना जुटेर धान रोप्न थालेको उनले बताइन् । स्थानीय बिर्ख गुरुङले घेर्मुफाँटका लागि सिँचाइको व्यवस्था रहेको र पछिल्ला दिनमा पानी पनि पर्न थालेकाले पानीको अभाव नभएको बताए ।

उनका अनुसार घेर्मुफाँटमा मार्सी र केही हाइब्रिड धान रोप्न थालिएको छ । यहाँ जौधान, गोरीलगायत स्थानीय जातको धान पनि खेती गरिँदै आएको छ । पछिल्ला वर्षमा हाइब्रिड धान रोप्ने क्रम बढेको मर्स्याङ्दी गाउँपालिका–५ का वडाध्यक्ष घनश्याम घलेले बताए ।

लमजुङको भुजुङभन्दा माथि यस क्षेत्रमा बस्ती छैन । घेर्मुभन्दा माथि गाउँ र खेत भए पनि धानबाली नहुने स्थानीय किसान बताउँछन् । घेर्मुफाँटमा धान रोप्न थालेपछि तल्लो क्षेत्रका बाहुनडाँडा, भुलभुलेलगायत स्थानमा पनि धान रोपाइँ सुरु हुने गर्छ । पश्चिमोत्तर क्षेत्रमा भुजुङ र उत्तरी क्षेत्रमा घेर्मुमा धान रोपाइँ सुरु भएपछि लमजुङका तल्लो क्षेत्रमा रोपाइँको चहलपहल बढ्छ ।

क्व्होलासोथार गाउँपालिका–४ भुजुङका वडाध्यक्ष नारायण गुरुङका अनुसार घिम्चेफाँटमा धान रोपिसकेपछि तल्ह्यु, राम्चे, कौंदी, किज्गुँलगायत स्थानमा धान रोप्ने गरिन्छ । मकै खेती नगरिने घिम्चे फाँटमा सुरुमै धान रोप्ने चलन रहेको उनले बताए । यहाँका अन्य फाँटमा भने असारमा मकै भाँचेर धान रोपाइँ गरिन्छ ।

‘भुजुङको घिम्चेमा लगाएको धान असोजमै भित्र्याइन्छ । त्यसपछि उक्त स्थानमा गाईभैंसीका गोठ ल्याएर राखिन्छ,’ वडाध्यक्ष गुरुङले भने, ‘गोठहरू बिस्तारै अन्य फाँट तथा स्वाँरातर्फ सरेपछि गहुँ, जौलगायत बाली लगाइन्छ ।’