सिंहले राइड–हेलिङभन्दा बाहिरका क्षेत्रमा पनि विस्तारको ठूलो सम्भावना रहेको बताइन् । ‘कुरियर, खाना डेलिभरी र अन्तरसहर यात्रा महत्त्वपूर्ण अवसरहरू हुन् । यी सबै सम्भावनाहरू अहिले मूल्यांकनकै चरणमा छन्,’ उनले भनिन् । कम्पनीले चालकहरूबाट उत्साहजनक प्रतिक्रिया प्राप्त भएको जनाएको छ । ‘एक साताभन्दा कम अवधिमा झन्डै २ हजार ५ सय चालक हामीसँग आबद्ध भइसकेका छन्, जसमा दुईपांग्रे र चारपांग्रे सवारी 

चालक दुवै छन् । २० हजारभन्दा बढी चालकले एप डाउनलोड गर्ने प्रयास गरेका थिए,’ सिंहले भनिन् । उनले उबरले नेपालमा उल्लेखनीय लगानी गरिरहेको र स्थानीय सञ्चालन दर्ताको प्रक्रिया पनि सुरु गरिसकेको जानकारी दिइन् ।

काठमाडौंमा आयोजित उद्घाटन कार्यक्रममा उबरका एसिया–प्रशान्त क्षेत्रका राइड्स विभागका उपाध्यक्ष तथा क्षेत्रीय महाप्रबन्धक डोमिनिक टेलरले नेपालको बढ्दो पर्यटन उद्योग उबरको प्रवेशको प्रमुख कारणमध्ये एक भएको जानकारी दिए ।

‘हामी दीर्घकालीन प्रतिबद्धतासहित नेपाल आएका हौं र आगामी दशक तथा त्यसपछिसम्म यहाँ रहने योजना छ,’ उनले भने । नेपाल पर्यटन विभागका महानिर्देशक रामकृष्ण लामिछानेले उबरको आगमनलाई स्वागत गर्दै पर्यटन विकासका लागि सहज यातायात अत्यावश्यक रहेको बताए । नेपालस्थित अमेरिकी दूतावासको कन्सुलर मामिला प्रमुख चेलन जे ब्लिसले अमेरिकी लगानीले नेपालको डिजिटल रूपान्तरणलाई समर्थन गरिरहेको धारणा राखिन् ।