काठमाडौँ — बजेटको प्रभावकारी कार्यसम्पादन र सन्तुलित मौद्रिक नीतिमार्फत नतिजामुखी आर्थिक विकासमा जोड दिनुपर्ने विज्ञहरूले औंल्याएका छन् । 

नेपाल व्यवस्थापन संघ (म्यान)को आयोजनामा आर्थिक वर्ष २०८३/८४ को बजेटमाथिको समीक्षा तथा आगामी मौद्रिक नीतिका लागि सुझाव संकलन गर्ने उद्देश्यले ‘बजेटपछिको विश्लेषण तथा आगामी मौद्रिक नीतिबारे छलफल’ विशेष अन्तर्क्रियामा  उनीहरूले यस्तो बताएका हुन् । दुई सत्रमा छलफल गरिएको उक्त कार्यक्रममा आर्थिक नीति, संरचनागत सुधार र स्रोत परिचालन विषयमा छलफल भएको थियो ।

छलफलमा बजेटको आकार, राजस्वको लक्ष्य र पुँजीगत खर्च बढाउनका लागि चालिनुपर्ने संरचनागत सुधारका उपायहरूमाथि विस्तृत समीक्षा गरिएको थियो । नीतिगत निरन्तरता र उद्योगमैत्री वातावरण निर्माणका लागि संसद् र सरकारले खेल्नुपर्ने भूमिकामाथि पनि जोड दिइएको छ ।

सहभागीहरूले बजेटको कार्यान्वयन प्रक्रिया र यसले निजी क्षेत्रमा पार्ने प्रभावबारे जिज्ञासा तथा नीतिगत सुझाव प्रस्तुत गरेका थिए ।

दोस्रो सेसन ‘आगामी मौद्रिक नीतिको दिशा र दृष्टिकोण’ विषयक अन्तरक्रियामा वित्तीय क्षेत्रको स्थायित्व र आर्थिक वृद्धिलाई सघाउने मौद्रिक नीति अत्यावश्यक रहेको बताएका थिए ।

राष्ट्रिय योजना आयोगका पूर्वउपाध्यक्ष डा. प्रकाश श्रेष्ठले कार्यपत्र प्रस्तुत गर्दै वर्तमान आर्थिक परिसूचक र आगामी मौद्रिक नीतिले लिनुपर्ने कार्यदिशाबारे प्राविधिक विश्लेषण प्रस्तुत गरेका थिए ।