उनका अनुसार पूर्वी खण्डको ६५ किलोमिटरमा कालोपत्र र ढलानको  काम सकिएको छ । ‘वर्षायाममा सहज यात्रा गर्न पाउनुहुनेछ,’ उनले भने,‘सडक कालोपत्रसँगै अहिले सडक सुरक्षालगायतका काम गरिरहेका छौं । जेठ १५ पछि दाउन्ने खण्डको यात्रा सहज हुनेछ ।’

पश्चिम खण्डतर्फ ८ सय मिटरमात्र ढलान हुन बाँकी रहेको पश्चिम खण्डका सूचना अधिकारी विकास खनालले बताए । ‘अबको १५ दिनमा हामी दाउन्ने खण्डमा गर्नुपर्ने कालोपत्र र ढलान पूरा गरिसक्ने छौं,’ उनले भने,‘वर्षायाममा यात्रा सहज हुने भएको छ ।’ यो सडक खण्डको काम पूरा नभएपछि चौथो पटक म्याद थप गरिएको थियो । पूर्वी खण्डको म्याद आगामी २०८३ साउन ७ र पश्चिम खण्डको म्याद २०८३ साउन ५ सम्म थप भएको छ । २०७५ चैतबाट काम सुरु भएको आयोजनाको चाैथाे पटक थपिएको म्याद आउँदो साउनमा सकिन लागेको हो । चिनियाँ ठेकेदार कम्पनी चाइना स्टेट इन्जिनियरिङ कर्पोरेसनले १७ अर्बमा दुई खण्डको १ सय १४ किलोमिटर सडक विस्तार ठेक्का लिएको थियो ।