विराटनगर — यसपटकको नीति कार्यक्रम विगतका तुलनामा बढी प्रगतिशील देखिएको मोरङका उद्योगी व्यवसायीले बताएका छन् ।

उद्योग संगठन मोरङका अध्यक्ष नन्दकिशोर राठीले उद्योग–व्यवसायका क्षेत्रमा डिजिटल भुक्तानीलगायतका नयाँ र आधुनिक कार्यक्रम समेटिनु सकारात्मक पक्ष भएको बताए । ‘उत्पादनमुखी उद्योग सञ्चालनमा सहजीकरण गर्ने नीति पनि निकै प्रशंसनीय छ,’ उनले भने ।

धेरै कार्यक्रम राम्रो हुँदाहुँदै पनि विगतका सरकारजस्तै कार्यान्वयन पक्ष फितलो हुन नहुने उनले बताए । ‘विशेषगरी यी कार्यक्रमलाई बजेटमार्फत कसरी प्रभावकारी रूपमा कार्यान्वयन गर्ने भन्ने विषयमा सरकारले गम्भीर रूपमा सोच्न आवश्यक छ,’ उनले भने, ‘कार्यान्वयन पक्ष मजबुत हुनुपर्छ । विगतमा जस्तै निराश पार्ने काम अब दोहोरिनु हुँदैन ।’

यसपटकको नीति कार्यक्रममा समेटिएका धेरै विषय सकारात्मक र व्यावहारिक देखिएको उद्योग वाणिज्य महासंघ कोशीका अध्यक्ष राजेन्द्र राउतले बताए । ‘विशेष गरी सूचना प्रविधिको निर्यात प्रवर्द्धन गर्ने विषयलाई प्राथमिकतामा राखिनु समयसापेक्ष कदम हो,’ उनले भने । यसले युवापुस्तालाई स्वदेशमै रोजगारी र उद्यमको अवसर सिर्जना गर्न सहयोग पुग्ने अपेक्षा गर्न सकिने उनले बताए ।

                                  _{राजेन्द्र राउत                                                                                    नन्दकिशोर राठी}

त्यसैगरी कृषियोग्य जमिन बाँझो नराखी उत्पादनमुखी बनाउन ‘भूमि बैंक’को अवधारणा ल्याइनु नौलो र महत्त्वपूर्ण योजना भएको उनले बताए । ‘यसले कृषि उत्पादन वृद्धि गर्नुका साथै कृषिलाई व्यावसायिक र आधुनिक बनाउन सहयोग पुर्‍याउन सक्छ,’ उनले भने, ‘२०६७ सालको उद्योग नीति परिमार्जन गरी राष्ट्रिय औद्योगिक नीतिमार्फत विभिन्न उद्यमी–व्यवसायीलाई लगानीका अवसर उपलब्ध गराउने कुरा पनि सकारात्मक छ ।’