बुटवल — सरकारको नीति कार्यक्रममा बुटवलका उद्योगी व्यवसायीले मिश्रित प्रतिक्रिया दिएका छन् । नीति कार्यक्रम आशालाग्दो भए पनि कार्यान्वयनमा कठिनाइ हुन सक्ने व्यवसायीको आशंका छ । 

नेपाल उद्योग वाणिज्य महासंघका केन्द्रीय सदस्य एवं बुटवल उद्योग वाणिज्य संघका अध्यक्ष हरिप्रसाद अर्यालले सरकारको नीति कार्यक्रमको आंशिक अध्ययनमा तुलनात्मक रुपमा प्रगतिशील रहेको बताए । उद्योगी व्यवसायीका धेरै सुझाव कार्यान्वयन पनि भएका छन् । ‘तुलनात्मक रुपमा सरकारले प्रस्तुत गरेको नीति कार्यक्रम प्रोग्रेसिभ छ,’ उनले भने, ‘तर, प्रस्तुत नीति कार्यक्रम कार्यान्वयन गर्ने मेसिनरी राष्ट्रसेवक र जनप्रतिनिधिसँग म्याचिङ हुन्छ कि हुँदैन भन्ने आशंका छ ।’ सुन्न जति लोकप्रिय छ, कार्यान्वयन त्यत्तिकै जटिल देखिएको उनले बताए । 

रूपन्देही उद्योग व्यापार संघका पूर्वअध्यक्ष एवं उद्योगी बाबुराम बोहराले सरकारले ल्याएका भूमि बैंक प्रणाली, आर्थिक कारोबार नगदरहित बनाउने, सबै कारोबार डिजिटल लगायतका कार्यक्रम सकारात्मक भएको बताए । उनले बाँझो जमिनलाई खेतीयोग्य बनाउने नीति कार्यान्वयन गर्न सके आर्थिक समृद्धिको बाटो खुल्ने बताए ।