पर्सा — वीरगन्ज भन्सार मातहतका पर्सा र बारामा रहेका ११ मध्ये २ छोटी भन्सार कार्यालय मात्र सञ्चालनमा रहेका छन् । राजस्व संकलन वृद्धि गर्ने उदेश्यसहित सरकारले १०० रुपैयाँभन्दा बढीको सामान भारतबाट ल्याउँदा भन्सार शुल्क तिर्नु पर्ने नियम कडाइका साथ लागु गरी रहदा भन्सार कार्यालहरू भने बन्द अवस्थामा छन् । 

पर्साको ठोरी र बाराको मटिअर्वा छोटी भन्सार मात्र हाल सञ्चालनमा छन् । बाराका पिपरपाति, सिम्रौनगढ, कवही र कचोर्वा छोटी भन्सार कार्यालय लामो समयदेखि बन्द रहेका छन् । त्यसैगरी, पर्साका सिर्सिया, भिष्वा, अलौं, गाढ प्रसौनी र जानकीटोला छोटी भन्सार पनि ठप्प छन् । २ सातायता सीमामा सुरक्षाकर्मीले कडाई गरेका छन् । यहाँ मुलुककै प्रमुख स्थल नाका वीरगन्ज मात्र नभई ग्रामिण भेगमा पनि थुप्रै नाका छन् । छोटी भन्सार कार्यालयहरूमा कर्मचारी अभावका कारण बन्द गर्नु पर्ने अवस्था आएको हो । छोटी भन्सार बन्द रहँदा सीमावर्ती नेपाली उपभोक्तालाई भन्सार शुल्क तिरेरै भारतबाट मालसामान ल्याउन समेत समस्या भइरहेको छ ।

छोटी भन्सार भएका अधिकांश नाका बजारहरू अहिले ठूलो बजारको रुपमा परिणत भईसकेका छन् । त्यहाँबाट दैनिक भारतीय बजारमा गई किनमेल गरेर फर्किने नेपालीको संख्या बाक्लै हुन्छ । सीमामा भन्सार कार्यालय नै नहुँदा सरकारले दैनिक ठूलो परिमाणमा राजश्व समेत गुमाई रहेको छ ।

सीमामा भन्सार कार्यालय नहुँदा आयातकर्ताले राजश्व तिरेर ल्याउन चाहे पनि त्यसो गर्न पाउँदैनन् । कोरोना महामारीपछि बन्द रहेको सिम्रौनगढ छोटी भन्सार पुनः सन्चालनका लागि त्यहाँका बासिन्दाले आन्दोलननै गरेका थिए । तर, उक्त भन्सार पनि नियमित छैन ।

हाल सञ्चालनमा रहेका छोटी भन्सारहरुमा १-१ नायब सुब्बा र कार्यालय सहयोगी खटाएको छ । वीरगन्ज भन्सार कार्यालयका प्रमुख भन्सार प्रशासक कृष्णप्रसाद मैनाली साना-तिना छोटी भन्सारहरू बन्द गर्दै लग्ने नीति रहेको बताउँछन् । ‘गाउँ गाउँमा भन्सार खोल्दा चोरी निकासी झनै बढछ,’ उनले भने, ‘यसो गर्दा मूल भन्सार पनि कमजोर बन्न जान्छ, १-२ ठाउँमा मात्र छोटी भन्सार चलाएर बाँकी रहेका छोटी भन्सार नाकाको जिम्मा सीमा सुरक्षामा खटिएका सशस्त्र प्रहरीलाई लगाउने नीति छ ।’