बर्षे धान रोप्ने सिजनको सुरुमै आवश्यकता पर्ने भएकाले यो लटको डीएपी मल अत्यन्त उपयोगी हुने साल्ट ट्रेडिङ वीरगन्ज कार्यालयका सूचना अधिकृत सन्जय गुप्ताले बताए ।
पर्सा — साल्ट ट्रेडिङ कर्पोेरेशन लिमिटेडले प्रादेशिक कार्यालय वीरगन्जमा १० हजार टन डिएपी मल भित्र्याएको छ ।
कार्यालयका सूचना अधिकृत सन्जय गुप्ताका अनुसार सातायता यो परिमाणमा डिएपी मल कर्पोरेशनको वीरगन्जस्थित गोदाममा भित्र्याइएको हो ।
साल्टले ग्लोबल टेण्डरबाट उक्त मल भित्र्याएको हो । भारतको आइपिएल (इन्डियन पोटास लिमिटेड)ले तेस्रो मुलुकबाट उक्त मल खरिद गरेर ल्याएको हो । वीरगन्ज नाकाबाट भित्रिएको यो मल सिर्सिया सुक्खा बन्दरगाह र सीमापारि भारतीय रेल्वे स्टेशन रक्सौल हुँदै आएको थियो ।
भित्रिएको मलको कोटा निर्धारणका लागि कार्यालयले मधेश प्रदेश सरकारको कृषि मन्त्रालयलाई पत्राचार गरिसकेको गुप्ताले जानकारी दिए । मन्त्रायलयले नै प्रदेशभरीका जिल्ला अनुसार सबै पालिकाहरुको मलको कोटा निर्धारण गर्ने उनले बताए । हाल डिएपीको माग नरहे पनि बर्षे धान बाली लागउने सिजनको सुरुमै आवश्यकता पर्ने भएकाले यो लटको मल अत्यन्त उपयोगी हुने गुप्ताले बताए ।
हाल सीमापारिबाट १ सय रुपैयाँ भन्दा बढीको मालबस्तु ल्याउँदा भन्सार शुल्क तिर्नुपर्ने नियम कडाइसाथ लागु गरिएपछि सीमावर्ती भेगका किसानले भारतबाट रासायनिक मल ल्याउन नपाएकाले पनि हाल भित्रिएको डिएपी अत्यन्त उपयोगी हुने छ ।
अन्न उत्पादनको भण्डार मानिने मधेश प्रदेशमा किसानले केही वर्षयता रासायनिक मल, सिँचाइ र बिउबिजनको अभाव झेलिरहेका छन् । यसले प्रदेशमै धानको उत्पादन कम हुँदै गएको किसानहरु बताउँछन् ।
