काठमाडौँ — ९औं अन्तर्राष्ट्रिय महिला उद्यमी व्यापार मेला आइतबार सकिने भएको छ । उपराष्ट्रपति रामसहायप्रसाद यादवले शुक्रबार ललितपुरमा मेलाको समुद्घाटन गरेका थिए ।  

समारोहमा उपराष्ट्रपति यादवले आफ्नो मन्तव्यमार्फत महिला उद्यमशिलता विकासको माध्यमबाट रोजगारीको सिर्जना गर्न र व्यक्ति, परिवार, समाज र समग्र राष्ट्रिय अर्थतन्त्रको सुधार गर्न सहयोग पुग्ने भएकाले यसतर्फ सम्बन्धित सबै सरोकारवालाहरुको ध्यान जान जरुरी भएको विषयमा जोड दिए । 

महिलाहरूको सामाजिक तथा आर्थिक सशक्तीकरणका लागि विभिन्न कार्यक्रम सञ्चालन गर्दै आएको महासंघले अहिले नवौं अन्तर्राष्ट्रिय महिला उद्यमी व्यापार मेला २०२६ आयोजना गरेको हो । मेलामा देशका विभिन्न जिल्ला तथा ग्रामीण क्षेत्रका सफल महिला उद्यमीहरूलाई उनीहरूको उद्यमशीलताको पहिचान, प्रोत्साहन र उत्साह अभिवृद्धि गर्ने उद्देश्य राखिएको छ ।

महासंघले नेपालभरका ७७ जिल्लामा जिल्ला महिला उद्यमी संघ स्थापना गरी ६ हजारभन्दा बढी महिला उद्यमीलाई सदस्यतामा आबद्ध गरिसकेको छ । करिब १ लाखभन्दा बढी अप्रत्यक्ष लाभग्राहीहरू रहेको महासंघको दाबी छ ।

मेलामा नेपालका विभिन्न जिल्लाका घरेलु, साना तथा मझौला महिला उद्यमी, व्यवसायी तथा निर्यातकर्तासहित विभिन्न देशका महिला उद्यमीहरूको सहभागिता छ ।

मेलाले महिला उद्यमीहरूलाई आफ्नो रैथाने तथा मौलिक उत्पादनको प्रदर्शन, बजार विस्तार, नेटवर्किङ र व्यापारिक सहकार्यको अवसर प्रदान गरेको महासंघको दाबी छ । मेलामा जम्मा १४० वटा स्टलहरु रहेका छन् ।