काठमाडौँ — संस्कृति, पर्यटन तथा नागरिक उड्डयन मन्त्री खडकराज पौडेल (गनेस)ले मन्त्रालय वा भेटघाटका क्रममा खिचिएका सौहार्दपूर्ण तस्बिरहरू प्रयोग गरेर केही व्यक्तिले आफ्नो विशेष सम्बन्ध रहेको दाबी गर्दै अनधिकृत लाभ लिन खोजेको भन्दै गम्भीर ध्यानाकर्षण भएको बताएका छन् । 

मन्त्री पौडेलले यस्ता गतिविधि नगर्न र नगराउन सबैलाई आग्रह गर्दै, कुनै पनि प्रकारको प्रभाव वा प्रलोभनमार्फत लाभ लिन खोज्ने प्रयास नगर्न फेसबुकमार्फत चेतावनी दिएका हुन् ।

आफूसँग खिचिएका सौहार्दपूर्ण तस्बिरहरूलाई आधार बनाएर गलत दाबी र अनधिकृत लाभ लिने प्रयास बढेपछि संस्कृति, पर्यटन तथा नागरिक उड्डयन मन्त्रीले कडा चेतावनी जारी गरेका हुन् ।

मन्त्रीले मन्त्रालयको कार्यसम्पादनलाई व्यवस्थित, मर्यादित र पारदर्शी बनाउन आफ्नो कार्यकक्षभित्र मोबाइल फोन तथा अन्य विद्युतीय उपकरण लैजान पूर्ण रूपमा निषेध गरिएको जानकारी पनि दिएका छन्।