काठमाडौँ — निर्वाचनपछिको पहिलो कारोबार दिन सेयर बजारमा उछाल देखिए पनि त्यो एक दिन पनि टिकेन । गत सोमबार बजार १६२ अंकले बढ्दा समग्र नेप्से २ हजार ८ सय ७५.४३ अंकमा पुगेर बन्द भएको थियो । तर, त्यसयता निरन्तर उच्च अंकले सेयर बजार ओरालो लागिरहेको छ । 

यसअनुसार बुधबार सेयर कारोबार मापक नेप्से परिसूचक ४६.७८ अंकले घटेर २ हजार ७ सय ९६.५७ अंकमा झरेको छ । जबकि मंगलबार ३२.०८ अंकले घटेर नेप्से २ हजार ८ सय ४३.३५ अंकमा ओर्लेको थियो । 

बुधबार पनि बजारले मंगलबारकै प्रवृत्ति पछ्याउँदा नेप्से भारी अंकले घटेको हो । मंगलबारको तुलनामा बुधबारको नेप्से १.६४ प्रतिशतले कम हो । गत सोमबार उच्च अंकले बढेको बजारमा अल्पकालीन लगानीकर्ताले नाफा सुरक्षित (प्रोफिट बुकिङ) गर्न थालेपछि मंगलबार र बुधबार नेप्से उच्च अंकले घटेको विश्लेषकहरूको दाबी छ । 

सो दिन कारोबारमा आएका ३४ वटा कम्पनीको सेयर मूल्य बढ्यो, २२५ वटाको घट्यो । बाँकी ३ वटा कम्पनीको सेयर मूल्य स्थिर छ । यद्यपि घटेको बजारमा पनि ३४ वटा कम्पनीका सेयरधनीले नाफा कमाएका छन् । ती कम्पनीको सेयर मूल्य बढेपछि सेयरधनीको सम्पत्तिको मूल्य बढेका रूपमा विश्लेषण गरिएको हो । जसअनुसार सालपा विकास बैंकको सेयर मूल्य सबैभन्दा धेरै १० प्रतिशतले बढ्यो । नेसनल हाइड्रोपावर कम्पनीको सेयर मूल्य ९.९६ र रिलायन्स स्पिनिङ मिल्सको सेयर मूल्य ९.३३ प्रतिशतले बढ्यो । 

बुधबार २२५ वटा कम्पनीका सेयरधनीले नोक्सान बेहोरे । यी कम्पनीको सेयर मूल्य घटेपछि लगानीकर्ताको सम्पत्तिको मूल्य पनि खुम्चिएको छ । यसअनुसार कालिका पावर कम्पनीको सेयर मूल्य सबैभन्दा धेरै ८.४७ र पञ्चकन्यामाई हाइड्रोपावरको ५.७७ प्रतिशतले घटे । सो दिन ३ वटा कम्पनीको सेयर मूल्यमा कुनै परिवर्तन भएन । 

बुधबार १ लाख १५ हजार ५ सय ५५ वटा कारोबारबाट ३ करोड ६० लाख ४९ हजार ४ सय ५१ कित्ता सेयर किनबेच भए । ती किनबेचमा १३ अर्ब १८ करोड २ लाख रुपैयाँ बराबरको सेयर कारोबार भएको छ । अघिल्लो दिनको तुलनाको कारोबार रकम पनि घटेको हो । मंगलबार २१ अर्ब ५० करोड २० लाख रुपैयाँ बराबरको सेयर कारोबार भएको थियो । 

एकै दिन यति धेरै सेयर कारोबार भएको यो ११ साउन २०८२ यताकै उच्च हो । सो दिन सेयर बजारमा २६ अर्ब ५७ करोड ७४ लाख रुपैयाँ बराबरको सेयर कारोबार भएको थियो । त्यसयता एकै दिन यति धेरै रकमको कारोबार भएको थिएन । मंगलबारको तुलनामा बुधबार कारोबार रकमसँगै कारोबार संख्या, कारोबार सेयर कित्ता सबै घटे । मंगलबार २ लाख ५ हजार ६ सय ११ वटा कारोबारबाट ५ करोड २७ लाख ११ हजार ३ सय ५३ कित्ता सेयर किनबेच भएको थियो ।