काठमाडौँ — अर्थमन्त्री रामेश्वर खनालले निजी क्षेत्र छाता संगठनका पदाधिकारीहरुसँग गरेका छन् । छलफलमा नेपालमा उद्योग वाणिज्य क्षेत्रका समस्या, लगानी वातावरणलगायत विषयमा छलफल भएको थियो । बिहीबार अर्थ मन्त्रालयमा अर्थमन्त्री खनालले र निजी क्षेत्रको तर्फबाट नेपाल उद्योग वाणिज्य महासंघका अध्यक्ष चन्द्रप्रसाद ढकाल, नेपाल चेम्बर्स अफ कमर्शका अध्यक्ष कमलेशकुमार अग्रवाल, नेपाल उद्योग परिसंघका अध्यक्ष वीरेन्द्रराज पाण्डे र नेपाल उद्योग व्यापार महासंघका अध्यक्ष खेमराज भण्डारी समेतको उपस्थितिमा समसामयिक आर्थिक विषयमा छलफल भएको हो ।

आफ्नो कार्यकालका प्रारम्भिक दिनमा जेन–जी आन्दोलनका कारण बिग्रिएको व्यावसयिक वातावरण र खस्किएको निजी क्षेत्रको मनोवल उठाउने प्रमुख चुनौती रहेकोमा सबैको साझा प्रयासबाट ती समस्याहरु समाधान भई हाल व्यावसायिक वातावरणमा सुधार आएको अर्थमन्त्री खनालले बताए ।

‘समष्टिगत आर्थिक स्थायित्व कायम गर्न, लगानीका लागि उपयुक्त वातावरण निर्माण गर्न, घरेलु उद्योगको संरक्षण गर्दै निर्यात प्रवर्द्धन गर्न, पुँजी बजारलाई पारदर्शी र लगानीमैत्री बनाउन र आर्थिक सुशासन कायम गर्नका विभिन्न क्षेत्रबाट आएका सुझावअनुसार केही विषय सम्बोधन भएको छ,’ अर्थमन्त्री खनालले भने, ‘वर्तमान परिस्थिति र नीतिगत जटिलताका कारण आफ्नो कार्यकालमा अर्थ मन्त्रालयबाट सम्पादन हुन बाँकी छ । ती काम आगामी अर्थमन्त्रीलाई हस्तान्तरण गर्ने छु ।’  

मुलुकको समग्र विकास र समृद्धिका लागि राजनीतिक स्थायित्व अपरिहार्य रहेको र सोका लागि हालै सम्पन्न निर्वाचनले दिएको नतिजाप्रति निजी क्षेत्र आशावादी रहेको विचार निजी क्षेत्रको धारणा थियो । वर्तमान सरकारले निर्वाचनका लागि भयरहित वातावरण निर्माण गरी निर्वाचनलाई निष्पक्ष रुपमा सम्पन्न गराएकाले मुलुकमा लगानी वातावरण सुधार हुने उनीहरुको भनाइ थियो ।