काठमाडौँ — यो साता दुई दिन आइतबार र मंगलबार मात्र सेयर बजार खुलेको छ । सोमबार सार्वजनिक बिदा भएकाले सेयर बजार बन्द रह्यो । अब निर्वाचनपछि आउँदो साता सोमबार मात्र सेयर बजार खुल्नेछ ।

निर्वाचनका लागि सार्वजनिक बिदा र नियमित बिदा परेकाले यो साता दुई दिन मात्र सेयर बजार खुलेको हो । आइतबार नेप्से १९.०४ र मंगलबार ३८.५२ अंक गरी दुई दिनमा समग्र ५७.५६ अंकले बढेको छ । गत साता पाँचै दिन सेयर बजार खुलेकामा चार दिन नेप्से परिसूचक बढेको थियो । 

चुनावअघिको अन्तिम कारोबार दिन मंगलबार नेप्से १ दशमलव ४४ प्रतिशतले बढेर २ हजार ७ दशमलव १२.४९ बिन्दुमा उक्लिएको छ । 

कुल २५४ कम्पनीको सेयर मूल्य बढ्यो, ६ कम्पनीको मूल्य घट्यो भने २ कम्पनीको मूल्य स्थिर रह्यो । मंगलबार साढे २ सय कम्पनीका सेयरधनीले नाफा कमाएका छन् । जसमध्ये सालपा विकास बैंकको सेयर मूल्य सबैभन्दा धेरै ९.९९, पञ्चकन्या माई हाइड्रोपावरको ९.८९ र रिलायन्स स्पिनिङ मिल्सको सेयर मूल्य ९.८२ प्रतिशतले बढेको नेप्सेले जनाएको छ । यीसँगै २ सय ५४ कम्पनीको सेयर मूल्य उकालो लागेको छ । तर ६ वटा कम्पनीका सेयरधनीको सम्पत्तिको मूल्य घटेको छ । तीमध्ये शुभम् पावर लिमिटेडको सेयर मूल्य सबैभन्दा बढी २ दशमलव ५३ प्रतिशतले घट्यो । बाँकी पाँच कम्पनीले पनि शुभम् पावरलाई नै पछ्याएका छन् । २ कम्पनीका सेयरधनी न नाफा न घाटाको अवस्थामा रहे । 

सो दिन कुल ६१ हजार ३ सय २९ पटकको सेयर किनबेचमा १ करोड ५१ लाख ८४ हजार ६ सय ७ कित्ता सेयर किनबेच भएको छ । ती किनबेचमा ६ अर्ब २३ करोड रुपैयाँको सेयर कारोबार भएको छ । अघिल्लो दिनको तुलनामा कारोबार रकम बढेको हो । गत आइतबार बजारमा ५ अर्ब ८४ करोड ८३ लाख रुपैयाँ बराबरको सेयर कारोबार भएको थियो । सो दिन कारोबार रकमका आधारमा आँखु खोला जलविद्युत् सबैभन्दा अघि छ ।

प्रतिकित्ता ३ सय ७१ रुपैयाँका दरले यो कम्पनीको ३४ करोड ६५ लाख रुपैयाँको सेयर कारोबार भएको छ । यस्तै, रिदी पावर कम्पनीको २७ करोड ७४ लाख, एसवाई प्यानल नेपालको २४ करोड ६७ लाख, मञ्जुश्री फाइनान्सको २२ करोड ६० लाख रुपैयाँको सेयर कारोबार भएको नेप्सेले जनाएको छ ।